Пойыз жолаушысынан безгек шыққан жағдайдағы іс-әрекеттер пысықталды

Өткен аптада Преснегорьковская – Павлодар бағыты бойынша келе жатқан пойыздың жолаушысы белгісіз қызбаға күдікпен ауруханаға түсті. Қазір вагон карантиндік тұйықта тұр, тиісті қызметтер алғашқы эпидемияға қарсы іс-шаралар өткізді.

Осы сценарий бойынша теміржол вокзалында "этиологиясы белгісіз қызба"тақырыбында жаттығу өтті. Профилактикалық іс-шараға облыстық денсаулық сақтау басқармасының медицина қызметкерлері, көліктегі СЭС, Ұлттық сараптама орталығы, Павлодар станциясындағы желілік полиция, ӘТЖК, Магистральдық желі мен Жүк тасымалы бөлімшелері және Павлодар станциясының қызметкерлері қатысты.

- Сценарийге сәйкес әйел Испаниядан келген, ол жолсерікке жоғары температура, бас ауруы, ентігу, бұлшықет ауруы туралы шағымданады. Ақпарат Павлодар станциясындағы кезекшіге беріледі. Келгеннен кейін вагон ағытылып, карантиндік тұйыққа жіберіледі. Науқас қаланың облыстық жұқпалы аурулар ауруханасына жатқызылады, байланыста болғандар вагон-изоляторға ауыстырылады, ауру шыққан ошақта қорытынды дезинфекция жүргізіледі, – деді Павлодар бөлімшелік көліктегі санитарлық-эпидемиологиялық бақылау басқармасының басшысы Төлеген Аязбаев. - Осындай оқу-жаттығу барысында жауапты қызметтер мен ведомстволардың өзара іс-қимыл алгоритмі пысықталуда. Негізгі міндет-инфекцияның одан әрі таралуын болдырмау үшін науқасты және онымен байланыста болғандарды  уақтылы анықтау және оқшаулау.

Оқу-жаттығу аяқталғаннан кейін жиналыс өтті, оның барысында іс-шараға тартылған ведомстволардың жетістіктері мен қателіктері талқыланды.

- Карантиндік және аса қауіпті жұқпалы аурулар бойынша әлемдегі тұрақсыз эпидемиологиялық жағдайға байланысты олардың Қазақстан Республикасының аумағына әкелінуіне және таралуына жол бермеу мақсатында осындай іс-шаралар жүргізілуде. Теміржолшылар өз әрекеттерін пысықтайды, сонымен қатар  қателіктермен жұмыс жасайды. Біз вирустардың таралуына байланысты кез келген оқиғаның дамуына әрқашан дайын болуымыз керек, – деді "ҚТЖ "ҰК" АҚ – "Павлодар магистральдық желі бөлімшесі" филиалының бас инженері Қазбек Оспанов.

Іс-шараға 15 мекемеден 60-тан астам маман қатысты. Мұндай тактикалық оқу-жаттығулар теміржол вокзалында ғана емес, Павлодар әуежайында да өткізіледі.