Қазақстан мен Өзбекстан темір жол желісін дамыта түспек

Қазақстан  Президенті Қасым-Жомарт Тоқаевтың Өзбекстанға екі күндік мемлекеттік сапары барысында бауырлас екі ел арасындағы байланысты одан әрі нығайта түсетін бірқатар келіссөздер жасалды. Сапар аясында екі ел арасындағы ынтымақтастыққа тың серпін беретін 17 құжатқа қол қойылды.  

Президенттер саяси, сауда-экономикалық, энергетикалық, көлік-логистикалық, мәдени-гуманитарлық салаларды кеңейтуге көңіл бөліп, қазақ-өзбек стратегиялық серіктестігінің ауқымды мәселелерін талқыға салды. Сонымен қатар Дарбаза – Мақтаарал темір жол құрылысын тезірек аяқтау үшін күш салуға уағдаласты. Аталған бағыт «Сарыағаш» өткізу пунктінің транзиттік әлеуетін кеңейтуге және жүктемесін азайтуға мүмкіндік береді. Сондай-ақ, Сырдария станциясына шығуға мүмкіндік беріп, Сарыағаш, Жетісай, Жылға сынды теміржол бекеттерін дамытады.  Тараптар аймақтағы сауда-көлік дәліздерін дамыту мәселесін де талқылай отыра бұл бағытта Қазақстан мен Өзбекстан маңызды рөл атқаратынына тоқталды. Қасым- Жомарт Тоқаев Дарбаза – Мақтаарал темір жолының артықшылықтары мен экономикалық тиімділігіне тоқталды. Сонымен қатар халықаралық көлік бағдарларын дамыту жайын сөз етті.  

– Қазақстан компаниялары түрлі көлік қатынастары құрылысына белсенді атсалысуға және қажетті материалдарды жеткізуге дайын. Біз Транскаспий халықаралық көлік бағытын бірлесе дамытуға уағдаластық. Біз тату көршілікке және сенімді серіктестікке негізделген қарым-қатынасты жаңа деңгейге көтереміз деп сенемін. Қазақстан мен Өзбекстан арасындағы ынтымақтастық неғұрлым тығыз және табысты болса, Орталық Азиядағы ахуал соғұрлым тұрақты болады, – деді Қазақстан Президенті.  

Екі елдің тауар айналымының артуына мүмкіндік беретін «Дарбаза-Мақтаарал» темір жолы жобасын іске асыру бірінші кезекте транзиттік әлеуетті 5 есеге арттыруға, сондай-ақ, ауыл шаруашылығы шикізат өнімдерін көп өндіретін Мақтаарал ауданын негізгі магистральдық теміржол желісімен қосуға мүмкіндік береді, тиісінше, өңірдің дамуына оң әсер етеді.  

Қазақстан теміржолында Өзбекстанға бағыт алатын негізгі жүк ағыны халықаралық Сарыағаш түйіспе станциясы арқылы өтеді. Алайда бұл станцияның өткізу қабілеті бүгінде шарықтау шегіне жеткен. Сондықтан қазақ-өзбек мемлекеттік шекарасында өткізу қабілетін арттыру үшін «Дарбаза-Мақтаарал» жобасын жүзеге асыру Сарыағаш-Ташкент теліміндегі жүк ағынын жеңілдетіп, жаңа тармаққа қайта бөлуге септік етеді. Сондай-ақ Түркістан облысының шекаралық аймағының дамуына серпін береді. Бұл жоба қолданыстағы Сарыағаш-Келес шекара өткеліне түсетін жүктемені де азайтады.