Басты талап – сапаға көңіл бөлу

Жаңалықтар

04.04.2017, 16:26

Ерлермен қатар әйелдердің де теміржолдың барлық саласынан табылуы таңсық емес. Солардың бірі – Семей станциясының қойма меңгерушісі Альмира Базарғазина. Семей және Жаңасемей станцияларын керек-жарақпен қамтамасыз етіп отырған Альмира Советбекқызы теміржолшыларға не керегін бес саусақтай біледі. Сондықтан өз тірлігіне мығым, батыл. Станция жұмысшылары бір орталықтан арнаулы киімдермен жабдықталады. Биылғы қыс теміржолшылардың барлығы қысқы киіммен, аяқ киім, қолғаппен толық жабдықталып, қыстан қысылмай шығуы Альмираның да еңбегі. Міне, енді көктем келісімен алда жаздық киімдерді сәуір айының 15 жұлдызына дейін таратып беру міндеті тұр. Осыдан бірнеше жыл бұрын киімдердің сапасының сын көтермейтіндігі шу болғаны есімізде. Қойма меңгерушісі Альмира осы мәселеге қатысты пікірін білдірді. –Иә, екі-үш жыл бұрын киім сапасына айтылар сын-ескертпелердің көп болғаны соншалық, жабдықтау жұмыстың басы-қасында болып, тікелей жұмысшылармен араласып жүргендіктен, олардың киім сапасына айтатын шағымдарын тыңдай-тыңдай құлақ жауыр болған. Қолдан келгенше жағдайды түзеуге тырысып, сапасыз киімдерді өндірушілерге кайтарып жіберіп, басшылар алдында да талай рет дәлелдеуге тура келді. Міне, көш жүре түзеледі демекші, жағдай бірте-бірте дұрысталып, алғашқы жылдағы кемшіліктер жойылды, бүгінде сапасыз киім-кешек алмаймыз, былтырғы, биылғы жылдарғы жылы киімдердің сапасы бұрынғыдан әлдеқайда жақсарғанын жұмысшылардың өздері де айтады. Бізде басты талап – сапаға көңіл бөлуді жолға қойдық, – дейді қоймашы келіншек. Альмира, сонымен қатар сегіз қырлы, бір сырлы өнерлі жан. Әнді тамылжыта салып, баянда, домбырада шебер ойнайды. Станцияның барлық мерекелік шараларына белсене араласады. Бөлімше бойынша өткізілетін спорттық шаралардың ортасынан табылады. Үйінің ішін гүл бағына айналдырған бағбандығының өзі бір төбе. Ол ол ма, бос уақытында тоқыма тоқу, тігін тігу, тамақ пісіруді ұнатады. 22 наурызда міндетті түрде наурыз көже пісіріп, үй ішімен қоса жұмыстағы әріптестерін де тілі дәм үйіретін көжеге тойдыруы әдетке айналған. Альмираның үлкен қызы Меруерт тұрмыста, мамандығы мұғалім, кіші қызы Мөлдір вокзалда билет кассирі.

Басты талап – сапаға көңіл бөлу

Басқа да жаңалықтар

Қазақстан теміржолшысы газеті, №32-33 28 сәуір 2026 жыл