Теміржолшылар соғыс ардагеріне ескерткіш тақта орнатты
Қызылорда облысы бойынша меншікті тілші
Ардагерлерін әманда құрметке бөлеп назардан тыс қалдырмайтын сырбойылық теміржолшылар, бұл жолы ҰОС ардагері әрі теміржолшы болған Любовь Колесниктің қызы Татьяна Червоненконың өтінішіне қолдау білдірді.
Қайырымдылық көмек ұйымдастырылып, марқұмның қабіріне ескерткіш белгі қойылғаннан кейін «Қазкөліккәсіп» ҚБ филиалының маманы Асылбек Көпжасаров, Қызылорда жол дистанциясының кәсіподақ ұйымының төрайымы Ғалия Ноғайбаева және ардагердің қызы Татьяна Червоненколар ардагердің қабірінің басына десте гүлін қойды.
Бұл жолғы қайырымдылық өткен жылдары өмірден өткен ардагер Любовь Колесниктің қабірінің басына ескерткіш белгі орнату мақсатында қолға алыныпты. Ардагердің соңында қалған қызы аймақ теміржолшыларына көмек беруін сұрап, өтініш білдірген екен.
– Анам өмірден өткеннен кейін оның басын қарайтып, ескерткіш орнату үшін жергілікті биліктен көмек сұрадым. Алайда олардан нәтижелі көмек берілмейтінін аңғарғаннан кейін анам жұмыс жасаған орын теміржолшыларға жүгінуге мәжбүр болдым. Өзім қазіргі таңда жалғыз басты болғандықтан осыдан басқа жасайтын шарам қалмады. Жергілікті теміржолшылар мен теміржолдың кәсіподақ ұйымдары жиылып менің өтінішімді жерде қалдырмай көмек берді. Олар бұған дейін де менің анамның хал-қадірін біліп жанынан табылатын. Теміржолшылар менің анамды өмірден өткенше ұмытпай құрмет жасады және қазір де көмек беріп өтінішімді орындауға атсалысты. Ешкімнің, ештеңенің ұмытылмайтынын теміржолшылар дәлелдеп, көзімді жеткізді. Мен теміржолшыларға ризалығымды білдіріп бас иемін, – дейді Татьяна Червоненко.
Марқұм Любовь Колесник 1925 жылы Түркістан облысының Арыс қаласында әскери қызметкер отбасында дүниеге келіпті. 1941 жылы Қызылорда медициналық техникумына түскен Любов Колесник техникумды тәмамдап, Ұлы Отан соғысына аттанып Г. Жуков басқаратын І-Белорус майданында Отанын жаудан азат етуге қатысады. 1945 жылдың қыркүйегінде Қызылордаға жеңіспен оралған Любовь Сергейқызы Қызылорда паравоз депосының медпункітіне фельдшер болып орналасып зейнет жасына жеткенше жемісті жұмыс жасайды.
