Ескі вагондарды кәдеге жаратты

Жақында «Қырғыз темір жолы» қайта жаңғыртылған вагондарды таныстырды. Ескі вагондар адам танымастай өзгеріп, жаңа келбетке ие болған. Бұл вагондар тек республика ішінде қатынауға арналған.

Есептен шығарлыған бұл құрамалар вагон жөндеу зауытында қайта құрастырылған.  

Вагонның өрт және электр қауіпсіздігі ережелерінің талаптарына сәйкестігі жөніндегі барлық рұқсаттары алынға және соған сай беріктік пен қауіпсіздігі сынақтан өткен.

«Айта кету керек, модернизациялау кезінде вагонның құрылымдық бөлігі өзгерген жоқ, вагонды модернизациялау салонды жақсарту және теміржол көлігімен саяхаттауды таңдаған адамдар үшін вагонда ыңғайлы және қауіпсіз болуын қамтамасыз ету болды», – делінген «Қырғыз темір жолы» мекемесі таратқан мәліметте.

Жолаушыларға жайлы болу үшін терезе саңылаулары үлкейтілген және панорамалық терезелер орнатылыпты, бұл сапар кезінде жайлы әрі жекелей орнатылған орындықтарға жайғасып алып Қырғызстанның әдемі табиғатын тамашалауға мүмкіндік береді.

Оған қоса вагонның жүріс бөліктеріне жаңа элементтер мен автотежегіштер орнатылған, бұл қозғалыс қауіпсіздігін қамтамасыз етеді. Сапардың ыңғайлылығы үшін қысқы-жазғы ауаны баптау жүйелері, ал жолаушыларға ыңғайлы болу үшін көлікте сусындарды салқындату үшін тоңазытқыш пен ауыз су құрылғысы орнатылған.

Сонымен қатар пойызда кетіп бара жатқан жолаушы жаңа толық экранды теледидарлардың бейне стерео жүйесінің сапасын бағалай алады.

Аталған мекеме вагондарды қайта жаңғырту жұмысын сырттан ешқандай күш тартпастан, өздері жасап шыққандарын айтуда.

Айта кетсек, осы жылдың алты айында «Қырғыз темір жолы» 111 553 жолаушыны тасымалдаған, оның ішінде 7 656 адам халықаралық қатынаста.

Сондай-ақ алты айда 4 млн тонна жүк тасымалданған, бұл өткен жылмен салыстырғанда 120,2% жоғары, таза өсім 736,4 мың тонна.

«Қырғыз темір жолы» ҰК» МКҚК тұрақты жұмысын қамтамасыз ету мақсатында жылжымалы құрам мен темір жол паркін қалыпты жағдайда ұстау үшін ескірген вагондарды қалпына келтіру бағытында тиісті жұмыстар жүргізіп келеді.

Пойыздар қозғалысының қауіпсіздігін және үздіксіз байланысты қамтамасыз ету үшін 8 шақырымнан астам ағаш шпалдар темірбетонға ауыстырылып, 2 шақырымды жаңа рельс төселген.

Тағы бір айта кетерлігі, осы жылдың 7 қыркүйегінен бастап «Қырғыз темір жолы» жүк тасымалы бойынша тарифтер бағасын 10%-ға көтермек.