Қауіп-қатерге толы кәсіп

Жаңалықтар

19.05.2017, 11:34

Оқуға 3 мин

Шымкент электрмен жабдықтау дистанциясына қарасты Қызылсай қосалқы тарту станциясының негізін қалаған теміржолшының бірі Шадихан Рысбеков отыз жылға жуық пойыздар қозғалысының қауіпсіздігін қамтамасыз етуге өз үлесін қосып келеді. Бұл қосалқы тарту станциясы – Түлкібас, Бадам, Қызылсай, Қазығұрт, станцияларындағы желі бойын, осы аумақтағы теміржол мекемелерін, жеке абоненттерді электр тоғымен қамтамасыз етеді. Теміржол бойындағы станциялар, вокзалдар мен оның қасындағы шағын мекемелерді жарықтандыруға қуат беріп отыр. Оған қоса теміржолға қарасты елді-мекен тұрғындарын да жарықпен қамтамасыз етеді. Шымкенттегі энерготехникумды бітірген Шадихан Асылұлы туған жері Бәйдібек ауданындағы Ақтас ауылында энергетик болып 13 жыл еңбек еткен соң 1989 жылы жаңадан ашылған Қызылсайдағы қосалқы тарту станциясына ауысады. Шадихан Асылұлы бізге осы қосалқы тарту станциясындағы барлық электр құрылғыларының қызметін таныстырды. ТП-1, ТП-2, ТП-3, ТП-4 сынды төрт трансформатордың екеуі 40 кВт тоқпен жұмыс істейтінін, қалғаны резерв үшін қорда тұратынын, апатты жағдай бола қалса, алғашқы көмекке барудың амалдары мен кіл электр тоғынан жасақталған станцияда еңбек етудің қауіпті тұстарына дейін тәптіштей түсіндірді. – Қызылсай қосалқы тарту станциясына 1989 жылы жаңадан кірген мені Омбы қаласына біліктілікті арттыру курсына оқуға жіберді. Ал станция 1990 жылы іске қосылған. Содан бері болат жол бойын электрмен жабдықтаудың түрлі сатысынан өттім. Осы ұжымды бірнеше жыл басқардым. Теміржолдағы электр жүйесі жүрген желілердің бәрі – қауіпті. Аса мұқият болуды талап етеді. Кезекші электр-механиктің міндеті – желі бойындағы электр қуатының үздіксіз жұмыс істеуін қадағалау. Абайсызда өшкен жағдайда жылдам әрекет жасап, қосуы тиіс. Өздерінің мүмкіндігі болмаса, әріптестерін көмекке шақырады. Өйткені пойыздар қозғалысында іркіліс болмау керек. Сосын, техника қауіпсіздігін сақтап, наряд бойынша бригаданы жұмысқа жібереміз. Бұдан бөлек, жұмысқа келген және кеткен уақытта толық аумақты көріп шығып, қайсысы өшірулі және қосулы екеніне көз жеткізіп, егер ақау шықса басшылыққа, диспетчерге хабарлаймын. Осы жерде еңбек етіп жатқан жігіттердің бәрі менің шәкірттерім. Отыз жыл бұрын 15 шақты маман болса, қазір 7-8 электр-механигі бар. Бұл саланың маманы ең алдымен нұсқаулықты түсініп, есте сақтап жүрсе көп қауіптің алдын алады. Біз енді зейнеттік демалысқа кетеміз, кейінгі жастардың жағдайын ойлаймын. Ұлттық компания қауіп-қатермен бетпе-бет жүріп еңбек ететін сала жұмысшыларының қауіпсіздігін арттыра түссе дейміз, – дейді жас әріптестерінің қауіпсіздігіне алаңдаған тәжірибелі маман. Айта кетерлігі, Шадихан Рысбековтың қос ұлы әке кәсібін жалғастырыпты. Рауан 8 жылдан бері осы қосалқы тарту станциясында әкесімен қатар жұмыс істеп, қазір басқарып отыр. Ал Рамазан жөндеу, тексеру телімінде (РРУ) электромеханик, немересі Думан Павлодардағы энергетика және электрофикация мамандығы бойынша университет студенті. Демек, электро-энергетиктердің тұтас бир династиясы қалыптасты деген сөз. Ұлттық компанияның бұрынғы президенті Асқар Маминнің «Алғыс хатын» алған теміржолшы биыл алпыс екіде, зейнеткерліктің де ауылы алыс емес...

Қауіп-қатерге толы кәсіп

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл