Студенттер ардагерлерге мерекелік көңіл-күй сыйлады
"Қазақстан теміржолшысы" газетінің тілшісі
Астанадағы Жоғары көлік және коммуникация колледжінің студенттері 7 мамыр Отан қорғаушылар және 9 мамыр Жеңіс күніне орай теміржолшы ардагерлерге арнап мерекелік шара өткізді.
ҚТЖ Ардагерлер кеңесінің ұйытқы болуымен өткен жиынға негізінен Ауаған соғысы мен Чернобыль апатын залалсыздандыруға қатысқан теміржолшы ардагерлер қатысты.
Салтанатты шара Екінші дүниежүзілік соғыста шейіт болған азаматтарымызды 1 минуттық үнсіздікпен еске алудан басталды.
Жиын барысында ардагерлер алапат соғыстың адамзатқа тигізген зауалы мен жеңіс жолында кеудесін оққа тоса отырып, қиян-кескі ұрыста ерлік көрсеткен сарбаздарымыз жайлы тағлымды әңгімелер айтты.
Құрметті теміржолшы, Локомотив депосының атақты машинисі, теміржолшылар әулетінен шыққан Рашид Мұқатов екінші дүниежүзілік соғыста жеңіске жету үшін жауынгерлермен қатар тылда еңбек еткен жандар да, оның ішінде теміржолшылар да аянбай тер төккені жайлы баяндады.
«Бұл тұрғыда өз әкем Мұхамедияр Мұқатов жайлы айтсам деп едім. Ол 1932 жылдан бастап теміржолда, паровозда жұмыс істеді. Соғыс жылдары ол аянбай еңбек етті. Сол себепті әкем Құрметті теміржолшы атағымен марапатталған алғашқы қазақтардың бірі болды. Ол жайында жазылған мақалалар бүкіл газет бетінде жарияланды. Әкемнің екі інісі де соғыс жылдары теміржол саласында еңбек етті», - деп естелігімен бөліскен ардагер болашақ теміржолшыларға оқуда озат болып, мамандықтарына берік болуына тілеулестік білдірді.
Студенттер өз кезегінде соғыс кезінде шыққан әндерді шырқап, күй шертіп жиналған қауымға жақсы көңіл-күй сыйлады.
«Жастарымыз сұрапыл соғыс жайлы кітаптан оқығаны болмаса, көп біле бермейді. Бұл тұрғыда тылда болған ардагерлердің өздерімен кездесіп, әңгімелерін тыңдаса, оның берері мол», - дейді колледж директоры Бірлік Қапезов.
Жыл өткен сайын Екінші дүниежүзілік соғысқа қатысқан теміржолшы ардагерлердің саны сиреп бара жатқаны белгілі. Бүгінде соғысқа қатысқан 9 ардагер, Ленинград блокадасына қатысқан 3, концлагерде тұтқында болған 4 теміржолшы ардагер қалыпты.
Кеш соңында Ардагерлер кеңесі атынан ардагерлерге сый-сияпат көрсетілді.
