Өлке тарихының шежірешісі

Жаңалықтар

13.06.2017, 14:13

Оқуға 2 мин

Түбек теміржолына 40 жыл еңбегі сіңген ардагер, Құрметті теміржолшы, "Құрмет белгісі" орденінің иегері, Қазақстан Журналистер Одағының мүшесі, Мұнайлы ауданының Құрметті азаматы Амандық Алдабергеннің "Аманат" атты кітабы оқырманға жол тартты. Өлке тарихынынң шежірешісі атанған теміржолшының бұл соңғы 15 жылдың ішінде жарыққа шығарған оныншы жинағы екен. Ардагер бұған дейін де "Маңғыстаудың күре тамыры", "Өмір мен аңыз", "Махаббат өрімі", "Теміржолдың түп қазығы", "Өмір өрнектері", "Жұлдыздай аққан жылдар-ай!..", "Түбекті түлеткен теміржол", "Шешілген түйін" және "Жоли баба" атты кітаптардың авторы болатын. Оның көбі аймақ теміржолының өткені мен бүгінін, қыры мен сырын қамтитын жинақтар. "Аманат" мүлде басқа бағытта, теміржолшының поэзия жанрындағы бірінші еңбегі. Маңғышлақ станциясында тәуелсіздіктен кейін алғаш құрылған аудан - Мұнайлының 10 жылдығы аясында Маңғыстау-5 ауылындағы №8 мектептен ашылған мұражай бөлмесінен ардагер Амандық Алдабергенге бұрыш бөлінген. Онда түбектің шежіресін жинақтаушы ардагер-темржолының бүкіл кітаптары мен жинаған фотосуреттері, құжаттар, қысқасы Маңғыстау темір жолының жарты ғасырлық тарихы түгел жинақталған. Маңғыстаулық теміржолшы ардагерлер кеңесінің төрағасы Амандық Алдаберген «ҚТЖ»ҰК»АҚ президенті жанындағы Консультативтік кеңес мүшесі. Жуырда «Ардагерлер ұйымы» республикалық қоғамдық бірлестігінің облыстағы кеңес төрағасы Серікбай Төлетов Амандық Алдабергенді «Қазақстан ардагерлер ұйымына — 30 жыл» мерекелік медалімен марапаттап, кеңестің ерордада өткен мерейтойлық салтанатына қатысып қайтқанын, онда жерлесіміздің еңбегі ерекше аталып өткенін жеткізді. Ардагер теміржолшы басқарып отырған салалық ардагерлер кеңесінің жұмысымен танысып, оң бағасын берді. — Қазір аймақтық кеңесте 792, Мұнайлы ауданындағы бастауыш ұйымда 250 теміржолшы ардагеріміз, Жаңаөзен, Шетпе, Бейнеу станцияларында тораптық ұйымдарымыз бар. Олармен байланысты жұмыстарымызды әр тоқсанға бөліп, стендке іліп қоямыз. Сонымен қатар қабырға тақтасынан қашан, кімнің мерейтойы болатыны, өткен күндердің естелік фотосуреттері, өзге де ақпараттарды табуға болады,-дейді кеңес жұмысынан хабар берген Амандық Алдаберген. Айтуынша, стендтің электронды нұсқасын былтыр Бурабайда өткен теміржолшы ардагерлердің семинар-жиналысына алып барыпты. Оған өзге өңірлердің бастауыш ұйымдары да қызығушылық танытып, ардагердің идеясы көпке үлгі болған көрінеді.

Өлке тарихының шежірешісі

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл