Рельсарқалық зауыты: өнімнің таралу нарығы кеңейтілуде

Жаңалықтар

15.08.2017, 11:34

Өткен аптада Үкімет басшысының бірінші орынбасары Асқар Мамин жұмыс сапарымен Ақтөбе облысына келіп, өңірдегі мемлекеттік бағдарламалар аясында жүзеге асырылып жатқан жобалармен танысты. Әрине, Ақтөбеге сапары барысында Асқар Мамин қазығы қағыла бастағаннан құрылысымен етене таныс рельсарқалық зауытына да ат басын бұрмай кеткен жоқ. Премьердің бірінші орынбасарын мұнда «Қазақстан темір жолы» ҰК» АҚ мен зауыт басшылығы бастаған топ қарсы алып, өндіріс барысынан есеп берді. Зауыттың бас директоры Андрей Кузьмин вице-премьерге зауыттың қазіргі тынысы жайлы баяндап, өндіріс қуатымен, эксперттік әлеуетімен таныстырды. Рельс зауыты өнімдерінің таралу нарығын кеңейтуге бағытталған жоспарлы жұмыстары жайлы хабардар етті. Бүгінде зауыт өнімдері Ресейдегі халықаралық стандарт тараптарына сәйкестендірілген. – Өзбекстан, Әзірбайжан, Түркіменстанмен жұмыс жасай бастадық. Отандық рельстер бір жылдан бері ішкі теміржол құрылыстарына пайдаланылып жатыр. Санаулы күнде Қытайға келіссөздер жүргізуге барамыз, – деген зауыт директоры кәсіпорынның бірнеше цехы мен зертханасындағы жұмыстармен де жан-жақты таныстырып, егжей-тегжейлі түсіндіріп өтті. Сондай-ақ, ресми меймандар келгенде әдеттегідей шикізаттан қалай рельс жасалатынын көрсетті. Яғни, Үкіметбасының бірінші орынбасары бастаған меймандарды өндірістің қыздыру пешінен бастап, дайын өнімді шығаруға дейінгі технологиялық процесімен таныстырды. Қысқа темірді бірнеше рет пеште қыздырып, екі жағынан тарту арқылы ұзартуға болатынын, одан ақырында қандай өнім шығатынына дейінгі процесті тәжірибе жүзінде ұсынды. Айта кетейік, Ақтөбе рельсарқалық зауыты жылдан жылға шығаратын өнім көлемін арттырып келеді. Бұрын бір жылда шығаратын өнім көлемін бүгінде 6 айда жасап үлгерген. Таяуда Ақтөбе жүк тасымалы бөлімшесінің басшысы Мағауия Оразқұлов жыл басынан бері рельсарқалық зауытының 70 мың тонна өнім шығарғанын салтанатты жағдайда хабарлағаны жайлы айтқан болатынбыз. Еске сала кетсек, жоба Қазақстанның индустриалды-инновациялық дамуы аясында жүзеге асырылған. Кәсіпорын ЕЭАС аумағындағы «Р-65» стандартты ұзын өлшемді (120 м) ыстыққа бейімделген теміржол рельстерінің жалғыз өндірушісі болып саналады. Жалпы, зауыт толық жобалы қуаттылыққа шыққан соң 2018 жылы жылына 430 мың тонна прокат, соның ішінде жоғары жылдамдықтағы магистральдар үшін 200 тонна стандартты ұзын өлшемді (120 м) ыстыққа бейімделген рельс, құрылыс секторы үшін 230 мың тонна фасондық өнім шығаратын болады.

Рельсарқалық зауыты: өнімнің таралу нарығы кеңейтілуде

Басқа да жаңалықтар

Қазақстан теміржолшысы газеті, №32-33 28 сәуір 2026 жыл