ҚТЖ машинистері теміржол өткелдерінде ондаған ЖКО-ның алдын алды
2025 жылдың басынан бастап ҚТЖ машинистері теміржол өткелдерінде 32 ықтимал жол-көлік оқиғасының алдын алды, деп хабарлайды Rail-news.kz.
Олардың кәсібилігі, жеделдігі мен жоғары жауапкершілігінің арқасында жолаушылардың зардап шегуіне, сондай-ақ жылжымалы құрам мен инфрақұрылымның зақымдануына жол берілмеді.
Барлық оқиғада жол ережесін автокөлік жүргізушілері бұзды: жақындап келе жатқан пойыздың алдынан жолға шығып, көлікті өткелде тастап, оқиға орнынан кетіп қалды. Соның бәрінде машинистер оқыс тежеу беріп, соқтығысудың алдын алды. Мұның бәрі пойыздардың жүру кестесіне әсер етті.
Әрбір оқиға туралы ақпарат құқық қорғау органдарына берілді.
ҚТЖ еске салады: теміржол өткелдерінен өту кезінде жол қозғалысы ережелерін сақтау қауіпсіздіктің міндетті шарты болып табылады. Жүргізушілердің жауапсыз әрекеті көлік процесінің барлық қатысушыларына үлкен қауіп төндіреді.
Компания уәкілетті органдармен өзара іс-қимылды күшейте отырып және халық арасында белсенді түсіндіру жұмыстарын жүргізе отырып, өткелдердегі қауіпсіздік деңгейін арттыру бойынша жүйелі жұмысты жалғастыруда. Темір жолдағы қауіпсіздікті қамтамасыз ету ҚТЖ қызметінің басым бағыттарының бірі болып қала береді.