Астанадағы мектеп, колледждерде теміржол сыныбы ашылады
«Қазақстан теміржолшысы» газетінің тілшісі
Жұмысшы мамандықтары жылы аясында 2025 жылғы қаңтар айынан бастап елордадағы мектептер мен колледждерде сервис, тамақтандыруды ұйымдастыру, техникалық қызмет көрсету, дизайн, тігін өндірісі, теміржол көлігі, IT, педагогика, медицина бағыттары бойынша «100 бейінді сынып» жобасы іске қосылды.
Астана қаласы Білім басқармасы басшысының бұйрығына сәйкес, әрбір бағыт бойынша техникалық және кәсіптік білім беру ұйымдары мен бейінді оқытуды жүзеге асыратын жалпы білім беретін мектептер бекітілді. Жобаға 7 ЖОО, Астана қаласының 21 колледжі мен 70 мектебі қатысады.
Бейінді 8-11 сыныптарда барлығы 2892 білім алушы қамтылды, оның ішінде теміржол көлігі бойынша 5 сынып, білім алушылар саны – 121, оның ішінде мемлекеттік тілде – 91, орыс тілінде 30 адам болып отыр.
2025 жылғы 1 ақпанда колледждер мектептермен келісілген тақырыптық жоспарлар әзірледі. Бейінді сыныптардың әр бағытына Астана қаласының әдістемелік орталығының жауапты әдіскерлері бекітілді. Бейінді сыныптардағы сабақтарды 170 арнайы пән оқытушылары мен өндірістік оқыту шеберлері жүргізеді.
Сабақтарды өткізу формалары: дәрістер, шебер-сыныптар, экскурсиялар, тренингтер, жобалық жұмыстарды қорғаумен дөңгелек үстел, слет және басқалар. Бейінді сыныптардың жұмысына колледждердің әлеуметтік серіктестері жұмылдырылған. Кәсіптік бағдар беру жұмысы әрбір білім алушыға нақты мамандықты таңдауға емес, саналы, дербес кәсіби таңдауды жүзеге асыруға, өз таңдауы үшін жауапты және кәсіби мобильді болуға мүмкіндік береді.