Бақты – Аягөз теміржол желісінің құрылысы талқыланды
Абай облысы әкімдігінде «ҚТЖ» ҰК» АҚ бастамасымен ауқымды инфрақұрылымдық жобаны — Бақты – Аягөз теміржол желісін салу мәселелері бойынша кеңес өтті, деп хабарлайды Rail-news.kz.
Жоба Мемлекет басшысының Қазақстан халқына Жолдауында айтылған тапсырмасы шеңберінде іске асырылуда және елдің көлік-логистикалық әлеуетін дамытуға, экспорттық маршруттарды кеңейту мен өңірдің транзиттік әлеуетін нығайтуға бағытталған.
Іс-шараға мемлекеттік және құқық қорғау органдарының өкілдері, China Harbor Engineering Company Ltd компаниясы бастаған Қытай Халық Республикасының делегациясы, сондай-ақ өңірдің бейінді кәсіпорындары мен құрылыс ұйымдарының басшылары қатысты.
Кеңесте құрылыс жұмыстарын ұйымдастыру мен үйлестіруге, объектілерде құқықтық тәртіп пен қауіпсіздікті қамтамасыз етуге, техникалық жабдықтауға, құрылыс материалдарын жеткізуге, сондай-ақ экологиялық және әлеуметтік стандарттарды сақтауға қатысты негізгі мәселелер талқыланды.
Кездесу қорытындысы бойынша нақты ұсыныстар әзірленіп, жобаны сапалы және уақтылы іске асыруға бағытталған уағдаластықтарға қол жеткізілді.
Бақты – Аягөз теміржол желісін салу жұмыстары жоспарлы тәртіппен жүргізілуде және «ҚТЖ» ҰК» АҚ мен мемлекеттік органдар тарапынан тұрақты бақылауда.
