Көлік министрі Тбилисиде өткен V «Silk Road Forum» аясында сөз сөйледі
Министр атап өткендей, Транскаспий халықаралық көлік бағытын (ТХКБ) дамыту – еліміз бен бүкіл өңір үшін стратегиялық басымдық. Соңғы жылдары елдің транзиттік әлеуетін арттыруға бағытталған инфрақұрылымдық жобалар жүзеге асуда, деп хабарлайды Rail-news.kz.
Министрдің айтуынша, Қазақстан ТХКБ бойынша үкіметаралық келісімге қол қою туралы бастама көтерді. Бұл құжат бірыңғай тарифтік тәсілдерді, жеткізу мерзімдері мен қызмет көрсету стандарттарын бекітеді.
Каспий теңізі арқылы жүк тасымалының тиімділігін арттыруға ерекше назар аударылуда. Жаңа паром жүйесін құру жоспарлануда. Бұл порттардағы жүк өңдеу уақытын қысқартып, елдердің теңіз порттарына жүкті барынша тезірек жеткізуге мүмкіндік береді.
Сондай-ақ Грузияның экономика және тұрақты даму министрімен кездесу өтті. Кездесу барысында министрлер экономикалық ынтымақтастықты нығайту мәселелерін талқылады. Көлік және логистика бағыттарын дамытуға, теңіз және авиациялық қатынасты кеңейтуге, сондай-ақ екі ел арасындағы сауда-экономикалық байланыстарды нығайтуға ерекше көңіл бөлінді. Министрлер көлік процестерін цифрландырудың маңызын атап өтті.