Өнерлі балақайларға өріс кең

Жаңалықтар

03.10.2017, 17:00

Ұлттық компанияда дәстүрлі түрде жыл сайын теміржолшылардың балалары арасында өткізілетін «Балауса болашақ» сурет және «Алтын қалам» шығармашылық байқауы өз мәресіне жетті. Компанияның бас ғимаратында аталған сайыстардың жеңімпаздарын марапаттау рәсімі салтанатты түрде аталып өтті. Алдымен сала ардагері, танымал теміржолшы, ұлттық компания Орталық ардагерлер кеңесі төрағасының кеңесшісі, әрі сурет өнерін өзіне серік еткен Асқар Сарсенбеков балаларға шеберлік сабағын өткізді. Ал марапаттау рәсімін компанияның персоналды басқару жөніндегі вице-президенті Нұржан Жапарқұл атқарып, қатысқан барлық балалар мен олардың ата-аналарына алғыс білдірді. «Алтын қалам» байқауы біздің компаниямызда төртінші жыл қатарынан өткізілуде. Бұл байқау жас таланаттарымызға олардың ата-аналарының мамандығы, теміржолшылардың отбасылық әулеттері, өздерінің мақсаттары мен армандары жайлы баяндап беруге мүмкіншілік береді. Биыл сурет байқауының тақырыбы – «ЭКСПО балалар көзімен» деп аталса, жас жазушы, ақындар үшін еркін тақырып берілді. Мұның барлығы біздің компанияның өз қызметкерлерінің тек қызметтік қана емес, отбасылық құндылықтарын да сақтап, дамытуға бағытталған тәрбиелік мәні зор жобасы деуге болады, – деді вице-президент. Сонымен сурет байқауында 5 жасқа дейінгі балалар арасынан Адия Аманжолова 1 орын алып, планшетке ие болса, 2 орынды Никита Огонесян мен Алаиз Ситдикова алып, оларға велосипед тарту етілді. 6-8 жас аралығы бойынша қатысқан жас қылқалам шеберлері арасынан екінші орынға Софья Хавлюк, Даяна Айтбекова, Әмір Туғанбай шығып, оларға да велосипед берілді. Ал осы жас аралығындағы үшінші орынды Ажар Есмұхамбет пен Аяулым Башаева бөлісіп, роликтерге ие болды. Одан әрі 9-11 жас аралығындағы 2-ші жүлделі жеңімпаз Нұрғиса Назарұлы, 12-14 жастар арасынан «Көрермен көзайымы» аталымына ие болған Бекболат Аманбек пен Азамат Бейсенбай, үшінші орын алған Амина Аманбек, екінші орынға ие болған Аружан Маликова, бірінші орынға шыққан Нұрбақыт Лесбек пен Жанна Балтабековлар да бағалы сыйлықтар және байқау дипломдарымен марапатталды. Балалардың өз жандарынан шығарған өлең, әңгіме шығармаларын танытатын «Алтын қалам» байқауынан Зарина Жұмабекова мен Арайлым Лесбек бірінші, Әлмансұр Кәкімов екінші, Анель Адырбаева үшінші орынды алды. Үздік өлеңдер шығармашылығынан Амаль Баймуханова екінші, Темірлан Сырлыбай үшінші орындарды иеленсе, Аяулым Башаева мен Мұхаммедрахим Қорғанбек ынталандыру сыйлығына ие болды. Шара барысында барлық қатысушы балаларға тәттілер мен сусындар үлестіріліп, арнайы сурет салу құралдары және қос байқаудың жеңімпаздарының шығармаларынан тұратын түрлі-түсті журнал сыйға берілді. Сонымен қатар апалы-сіңлілі трио – Жамиля, Румиля, Амина Аманқос есімді теміржолшылар отбасынан шыққан жас өнерпаздар өнер көрсетті.

Өнерлі балақайларға өріс кең

Басқа да жаңалықтар

Қазақстан теміржолшысы газеті, №48 23 маусым 2026 жыл