Шымкентте «Заң және тәртіп» тұжырымдамасы аясында «Қауіпсіз өткел» республикалық акциясы өтті
Қазақстан Республикасының Президенті Қасым-Жомарт Тоқаев жариялаған заң және тәртіп идеологиясын қоғамда ілгерілету жөніндегі тұжырымдама шеңберінде Шымкент қаласында жол-көлік оқиғаларының алдын алуға және теміржол өткелдерінде қауіпсіздік мәдениетін арттыруға бағытталған «Қауіпсіз өткел» республикалық профилактикалық акциясы өтті, деп хабарлайды Rail-news.kz.
Іс-шараны Шымкент магистральдық желі бөлімшесі ұйымдастырды. Акцияға теміржолшылар, көлік полициясы, көліктік бақылау инспекциясы және Абай ауданы әкімдігінің қызметкерлері қатысты.
Іс – шара Игілік және Бадам станциялары арасындағы Шымкент – Арыс учаскесінің 3265 км темір жол өткелінде өтті. Бұл өткел аймақтағы ең көп жүретін жолдардың бірі болып табылады, мұнда күн сайын 35 жұп жүк және 12 жұп жолаушылар пойызы, сондай-ақ 7 мыңға жуық вагон өтеді. Өткел арқылы қалалық бағыттағы автобустар қатынайды және Абай ауданының, Арыс қаласы мен Түркістан облысының Ордабасы ауданы елді мекендерімен қарқынды автомобиль қатынасы жүзеге асырылады.
Акция барысында жүргізушілерге темір жолдарды қауіпсіз кесіп өту ережелері және оларды бұзғаны үшін жауапкершілік туралы ескертілді. Қатысушылар ақпараттық жадынамалар таратып, автокөлік жүргізушілерімен профилактикалық әңгімелер өткізді.
Қауіпсіздік мәселелері бойынша нұсқаулықтан 108 жеңіл автомобиль жүргізушісі және 33 жүк көлігінің жүргізушісі өтті.
ҚТЖ теміржол өткелі қауіптілігі жоғары объект болып табылатынын еске салады. Жүргізушілер жол белгілері мен бағдаршам сигнализациясының талаптарын қатаң сақтауы, тыйым салу сигналы кезінде өткелге шықпауы және жақындап келе жатқан пойыздың алдында жолдарды кесіп өтпеуі қажет.
«Қауіпсіз өткел» профилактикалық акциялары еліміздің барлық өңірлерінде тұрақты негізде өткізіледі. Оларды өткізудің мақсаты – теміржол өткелдеріндегі апаттылықты азайту, жол қозғалысы қатысушыларының жауапкершілігін арттыру және азаматтардың өмірі мен денсаулығын сақтау.
