Машинист көмекшісінің жанұясы марапатталды

Жаңалықтар

17.05.2016, 17:30

Ел Тәуелсіздігінің 25 жылдығы және халықаралық отбасы күні қарсаңында Қызылордада өткен «Отбасы – тәрбие ұясы» атты облыстық байқауға қатысқан машинист көмекшісі Исабеков Нұрлыбектің жанұясы жүлделі орын алды. Байқауға шаңырақ көтергендеріне 25 жыл толған үлгілі жанұялар қатысты. «Нұр Отан» партиясының Қызылорда облыстық филиалы ұйымдастырған байқауға қаладан бөлек барлық ауданнан жанұялар қатысты. Қызылорда локомотив пайдалану депосы ұжымынан қатысқан тепловоз машинисінің көмекшісі Исабеков Нұрлыбектің отбасы II дәрежелі дипломмен марапатталды. –Байқаудың негізі мақсаты Тәуелсіздік жылдарындағы отбасы жетістігін насихаттау, отбасы құндылықтарын дәріптеу және отбасын нығайту мен дәстүрлерді сақтау, мемлекеттілігімізді дамыту, – деді өз сөзінде шара шымылдығын ашқан облыстық партия филиалы төрағасының бірінші орынбасары Ибадулла Құттықожаев, қатысушы отбасыларға сәттілік тілеп. Үш кезеңнен тұратын байқауда отбасылар өздерін таныстырып, өз өнерлерін көрсетумен қатар «Тәуелсіздікке тарту» деп аталатын ақырғы айналымда 25 жылда қол жеткен отбасы жетістіктерін паш етті. Сайыс қорытындысы бойынша 1 орынды Жалағаш ауданынан келген Жанашевтар отбасы иеленсе, 2 орын теміржолшы-локомотивші Исабековтер отбасына және 3 орын Шиелі ауданынан келген Арыстанбековтер жанұясына бұйырды. Сондай-ақ, «Салауатты отбасы», номинациясымен, «Жарасымды жанұя», «Шығармашыл отбасы», «Жаңашыл отбасы» және «Көрермендер көзайымы» номинацияларын иеленген отбасылар да сый-сыяпаттан құр қалмады. Барлық қатысушыларға арнайы дипломдар мен бағалы сыйлықтар табыс етілді.

Машинист көмекшісінің жанұясы марапатталды

Басқа да жаңалықтар

«Қазақстан теміржолшысы» газеті, №22-23 28 наурыз 2025 жыл