Мемлекет басшысының Бельгияға сапары аясында көлік саласында жаңа келісімдер жасалды
Мемлекет басшысының Бельгия Корольдігіне ресми сапары аясында көлік инфрақұрылымын дамытуға, халықаралық ынтымақтастықты кеңейтуге, саланы цифрландыруға және Қазақстанның транзиттік әлеуетін нығайтуға бағытталған бірқатар келісімдер мен меморандумдарға қол қойылды деп хабарлайды Rail-news.kz.
Негізгі құжаттардың бірі Қазақстан Республикасы Үкіметі мен Еуропалық Одақ арасындағы әуе тасымалдарының кейбір аспектілері туралы келісім болды. Құжат Қазақстан мен Еуропалық Одаққа мүше мемлекеттер арасындағы әуе қатынасын одан әрі дамытуға бағытталған. Бұл бағыттар желісін кеңейтуге, жолаушылар ағынын арттыруға және іскерлік әрі туристік байланыстарды дамытуға ықпал етеді.
Теміржол саласында «ҚТЖ» ҰК» АҚ мен Alstom компаниясы арасында KZ6A сериясындағы электровоздарға сервистік қызмет көрсету бойынша ынтымақтастық туралы келісімге қол қойды.
Көлік саласын цифрландыру мәселелеріне де ерекше назар аударылды. Интелектуалды көлік жүйелері мен «Е-жолдары» цифрлық платформасын енгізу жөніндегі өзара түсіністік туралы меморандумға, сондай-ақ Қазақстан Республикасы Көлік министрлігі мен SITA B.V. арасында мемлекеттік әуежайларды кешенді цифрландыру, оның ішінде жолаушыларды биометриялық сәйкестендіру жүйесін енгізу саласындағы ынтымақтастық туралы меморандумға қол қойылды.
Халықаралық логистика саласында «KTZ Express» АҚ мен Midia Marine Terminal, Ecco Rail және A.P. Moller – Maersk компаниялары арасында ынтымақтастық туралы келісімдерге қол қойылды. Қол жеткізілген келісімдер мультимодальды тасымалдарды дамытуға, халықаралық логистикалық қызметтерді кеңейтуге және Транскаспий халықаралық көлік бағытының бәсекеге қабілеттілігін арттыруға бағытталған.
Қол қойылған құжаттар Қазақстан мен еуропалық серіктестер арасындағы көлік инфрақұрылымы саласындағы өзара іс-қимылдың жоғары деңгейін растайды және халықаралық ынтымақтастықты кеңейтуге, сондай-ақ стратегиялық маңызы бар жобаларды іске асыруға қосымша мүмкіндіктер ашады.