Қазақстан мен Түрікменстан транзиттік-логистикалық әлеуетті арттыруға уағдаласты
Астанада өткен екі ел үкіметаралық комиссиясының 14-ші отырысында көлік-логистика саласындағы әріптестік экономикалық байланыстардың басты қозғаушы күші ретінде ерекше талқыланды. Бүгінде бұл бағытта тұрақты оң динамика байқалады деп хабарлайды Rail-news.kz.
2025 жылдың қорытындысы бойынша теміржол арқылы жүк тасымалы көлемі 8%-ға өсіп, 1,9 млн тоннаны құрады. Ал 2026 жылдың алғашқы бес айында бұл көрсеткіш бірден 46%-ға артып, 1 млн тоннаға жетті.
Қытай – Қазақстан – Түрікменстан – Иран халықаралық маршрут бойынша тасымал көлемі бір жылда 2,5 есеге ұлғайған.
Тараптар «Солтүстік – Оңтүстік» халықаралық көлік дәлізінің шығыс бағытын бірлесіп дамытуға, транзиттік мүмкіндіктерді кеңейтуге және теміржол, автомобиль, авиация және теңіз салаларындағы ынтымақтастықты нығайтуға ниетті екендерін растады.
Қол жеткізілген келісімдер екі елдің транзиттік әлеуетін сапалы жаңа деңгейге көтеруге және аймақтық логистикалық хаб ретіндегі рөлін күшейтуге бағытталған.