Талғат Алдыбергенов Маңғыстау облысындағы теміржол нысандарын аралады
«Қазақстан темір жолы» ұлттық компаниясы» АҚ Басқарма төрағасы Талғат Алдыбергенов жұмыс сапарымен Маңғыстау облысына барып, Құрық және Ақтау порттарын, сондай-ақ «Каскор-Транссервис» АҚ-ны аралады деп хабарлайды Rail-news.kz.
Көшпелі кеңестер барысында Транскаспий халықаралық көлік бағытын дамыту, теміржол мен теңіз көлігінің өзара іс-қимылын күшейту, өндірістік процестерді цифрландыру, тасымалдау тиімділігін арттыру және қызметкерлердің еңбек жағдайларын жақсарту мәселелері қаралды.
Кеңесте Транскаспий маршрутының негізгі логистикалық тораптарының бірі саналатын Құрық портын дамытуға ерекше назар аударылды. 2026 жылдың алғашқы бес айында порт арқылы 731 мың тонна жүк өңделді. Құрық портының Орталық Азия, Кавказ және Түркия елдері арасындағы қосымша жүк ағындарын тартуда әлеуеті жоғары екені атап өтілді.
Кеңес қорытындысы бойынша ҚТЖ басшылығы жүк тасымалы бойынша жоспарлы көрсеткіштердің орындалуын қамтамасыз ету, транзиттік жүктерді үздіксіз өңдеуді ұйымдастыру, жаңа клиенттерді тарту мақсатындағы маркетингтік жұмысты жандандыру, сондай-ақ Құрық порты базасында іске асырылып жатқан «Жаңа Транскаспий паром жүйесі» жобасының жүзеге асырылуын қамтамасыз ету жөнінде нақты тапсырмалар берді.
Күн тәртібіндегі әлеуметтік саясат мәселелеріне де ерекше көңіл бөлінді. Басқарма төрағасы еңбек адамының мәртебесін арттыру компания қызметіндегі басым бағыттардың бірі екенін атап өтті. Осыған байланысты қызметкерлерді арнайы киіммен қамтамасыз ету, санитарлық-тұрмыстық жағдайларды жақсарту, әлеуметтік тұрақтылық индексінің көрсеткіштерін арттыру, сондай-ақ Маңғыстау облысының әкімдігімен бірлесіп жүзеге асырылып жатқан «Жұмыс жасаймын» бағдарламасын жалғастыру тапсырылды.
Ақтау портында кәсіпорын қызметінің тиімділігін арттыру мәселелері қаралды. 2026 жылдың қаңтар–мамыр айларында портта 2 млн тоннадан астам жүк өңделді. Каспий теңізі деңгейінің төмендеуіне байланысты порт акваториясын тереңдету жобасын іске асыруға ерекше назар аударылды.
