ҚТЖ жүк тасымалында «Заң және тәртіп» тұжырымдамасын іске асыруды талқылады
«ҚТЖ – Жүк тасымалы» ЖШС-да «Заң және тәртіп» тұжырымдамасын іске асыру шеңберінде заңнаманы ұстану, қауіпсіздік және жүктердің сақталуы мәселелері талқыланды, деп хабарлайды Rail-news.kz.
Іс-шараға Астана қаласы бойынша Сот әкімшілігі департаментінің, Бас көлік прокуратурасының, «ҚТЖ – Жүк тасымалы» ЖШС орталық аппаратының және филиалдарының өкілдері қатысты.
Астана қаласы Сот әкімшілігі департаментінің басшысы Елдос Жұмақсанов теміржол жүк тасымалы саласындағы даулар бойынша сот практикасын назарға ұсынды. Еңбек заңнамасын қолдану, еңбекті қорғау және өндірістегі қауіпсіздік мәселелері жеке қаралды.
«ҚТЖ – Жүк тасымалы» ЖШС Құқықтық қамтамасыз ету департаментінің директоры Алан Алмұханбетов ЖШС-ның құқық бұзушылықтардың алдын алу және қызметкерлердің құқықтық мәдениетін арттыру жөніндегі жұмысы туралы айтып берді.
Қатысушылар сондай-ақ құқық қорғау және сот органдарымен өзара іс-қимыл, бұзушылықтардың алдын алу мәселелерін талқылады.
Ашықтықты арттыру және құқық бұзушылық тәуекелдерін азайту үшін тасымалдау процестері цифрлық форматқа ауыстырылатыны атап өтілді. Республикаішілік қатынастағы құжаттарды электрондық ресімдеу үлесі 99,7% жетті. Көршілес елдердің теміржол әкімшіліктерімен электрондық деректер алмасу дамуда.
Кездесу қорытындысы бойынша заңдылықты нығайту, қауіпсіздікті арттыру және жүк тасымалдарындағы цифрлық шешімдерді дамыту бойынша одан әрі шаралар айқындалды.
