Қозғалыстағы пойызға жармасқан азаматтар машинисті шұғыл тежеуге мәжбүр етті
«Қазақстан теміржолшысы» газетінің тілшісі
Көлік полициясы теміржол көлігі құралдарын пайдалану қағидаларын бұзған және жолаушылар пойызына тас лақтырып бұзақылық жасаған құқық бұзушыларды анықтап, жауапқа тартты.
2 қыркүйекте Алматы-1 станциясындағы көліктегі полиция басқармасының қызметкерлері теміржол көлігіндегі жүріс-тұрыс қағидаларын өрескел бұзып, қозғалыс қауіпсіздігіне қауіп төндірген үш азаматты ұстап, жеке басын анықтады. Олар Жамбыл және Алматы облыстарының 32-35 жастағы тұрғындары болып шықты. Сонымен қатар Алматы – Атырау бағытындағы жолаушылар пойызы Алматы-1 станциясынан жылжи бастаған кезде құқық бұзушылардың қозғалыстағы локомотивтің тұтқасын ұстап, сатысына секіріп мінуге әрекеттенгендері анықталды. Тіпті олар машинист кабинасына бөгде заттар лақтырған.
Бұл адам өмірі мен денсаулығына қауіп төндіргендіктен, машинист шұғыл тежеуді қолдануға мәжбүр болған. Пойыздың жоспардан тыс аялдау уақыты 2 минутты құрады. Ұсталған азаматтар алкогольді ішімдік ішіп, қоғамдық орындарға мас күйінде жүргені үшін және теміржол көлігі құралдарын пайдалану қағидаларын бұзу фактілері бойынша әкімшілік жауапкершілікке тартылды.
Ал Шымкент станциясындағы көліктегі полиция басқармасының қызметкерлері Саратов – Алматы бағытындағы жолаушылар пойызына тас лақтырған үш жасөспірімді анықтады.
Полицейлер вагон терезесінен теміржол жиегінде жүрген үш жасөспірімнің өтіп бара жатқан пойызға тас лақтырып жатқанын байқаған. Қауіптің алдын алу мақсатында полиция қызметкері пойыз машинисімен шұғыл байланысып, жылдамдықты төмендетуді сұрады. Жедел қабылданған шаралардың нәтижесінде жасөспірімдер ұсталып, ата-аналарымен бірге Шымкент станциясындағы көліктегі полиция басқармасына жеткізілді. Кәмелетке толмағандар заңды өкілдерінің қатысуымен өз әрекеттерін мойындады. Ата-аналары балаларды тәрбиелеу жөніндегі міндеттеріне салғырт қарағаны үшін әкімшілік жауапкершілікке тартылды.
Полиция өтіп бара жатқан пойыздарға тас немесе өзге де заттарды лақтыру жолаушылар мен пойыз бригадасы мүшелерінің өмірі мен денсаулығына, сондай-ақ теміржол қозғалысының қауіпсіздігіне елеулі қауіп төндіретінін ескертеді. Ал ата-аналарды бала тәрибесіне жіті көңіл бөлуге шақырады.