Маңғыстау жастары бас қосты
Маңғыстауда теміржолшы жастардың аймақтық форумы болып өтті. Шараның ашылу салтанатында сөз алған Маңғыстау жол бөлімшесі директоры Н. Ғұбашев бүгінгі шара жастар саясатына «ҚТЖ» ұлттық компаниясының жастар саясатын қолдаудағы айқын көзқарасы деді.
Аймақтағы теміржол мекемелеріндегі жастардың басын қосқан жиын «ҚТЖ» ҰК» АҚ әлеуметтік жұмыстары жөніндегі департаментінің жастар ісі жөніндегі бөлімнің ұйымдастыруыменен жүзеге асқан. Бөлім жетекшісі Жанар Беркенова форумды өткізудің мақсат-міндеттеріне тоқталып, жастарға әлеуметтік қолдау көрсету мәселесі компанияның ұжымдық келісімшартында көрініс тапқанын айтты.
– Біз республикадағы барлық теміржолшы жастарға «Болашақ басқарушылар» және «Жоба – менеджмент» бағдарламалары бойынша аймақтық инновациялық оқыту -тренингтерін жүргізуді қолға алдық. Былтыр да осы шараны Ақтау қаласында өткізген болатынбыз. Жастарды маңызды бағыттар бойынша оқытып, нәтижесінде Шетпе станциясының пойыз құрастырушысы Руслан Сақтағановтың жобасы үздік үштікке енген болатын. Биыл да осы үрдісті жалғастырмақшымыз, жастар идеясы біз үшін маңызды, – деді ол.
«Болашақ басқарушылар» мен «Жоба – менеджмент» бағдарламалары кәсіби мамандарды таңдауға мүмкіндік береді, сондай-ақ, инновациялық ойларды, үздік жобалар мен кәсіби деңгейлері жоғары жас теміржолшыларды іздеуге бағытталған. Аталған екі бағдарламадан өткен жастар жыл соңында Астана қаласында өтетін респбликалық жастар форумына жолдама алады. Ол үшін ұсынылған жоба арнайы 4G жүйесіне енгізіліп, жобаның компанияға қаншалықты тиімді екендігі, қанша табыс әкелетіндігі, экономикалық жағдайы, рентабельдігі сарапқа салынады. Сүзгіден өткен соң ғана, арнайы сарапшылар тобы аймақтағы қай жоба көзге түссе Астанаға жолдама алмақ.
Форум жұмысы екі күнге созылды. Теміржолшы жастар түрлі тақырыптарда дәріс тыңдап, тренингтерге қатысты. Семинар соңында инновациялық оқыту тренингіне қатысқан жастардың барлығына арнайы сертификат табысталды.
Анаргүл Жексембайқызы, Маңғыстау