Бұрмалар жөнделді

Қауіпсіздік мәселесіне қатысты алынар шаралар көп, соның бірі – бағыттамалы бұрмалардың талапқа сай болуы.

 Бағыттамалы бұрма үшкірі үнемі қозғалысқа түсіп тұратындықтан, ол бірте-бірте желініп, жұқара бастайды. Желінген соң оның ұшы деңгейінен төмен түсе береді. Рельс үстімен жылжып келе жатқан жылжымалы құраманы бір жолдан екінші жолға бағыттау үшін бұрманы не оңға не солға бұру қажет. Егер бұрма үшкірі желініп, әбден қажалған болса вагон доңғалағы рельстен тайып кетуі ғажап емес. Міне, осы жұмыстарды жасау қалпына келтіру пойызына жүктеледі.

Ақжайық қалпына келтіру пойызы арнайы «терезе» алып, былтырғы жылы Атырау, Махамбет, Ганюшкино, Сазанқұрақ станциялары мен Афанасьев, 441 разъездері аралықтарында 14 бағыттамалы бұрма үшкірін қалпына келтіріп, жол қауіпсіздігіне жағдай жасаса, биылғы жылы Атырау станциясында әбден тозып желінген екі бұрма үшкірін жөндеген. Бұл жұмыстар алда да жалғасын табады. ВПРС, Унимат машиналарын қолдану арқылы бағыттамалы бұрмалар мен жалғамалы жолдарды көтеру мақсатында 211 бұрма жөнделген.

Қосұйым Мұқашев, Атырау