Жолдарды ұзарту қажет

Жаңалықтар

18.11.2016, 12:16

Оқуға 3 мин

Түркістан станциясында осыдан 2-3 жыл бұрын ұзынқұрамды пойыздар жиі өтетіндіктен, станциялық жолдар оған тарлық қылатын. Бір ұзын пойыз үш жолды ұстап тұратындықтан, бекеттегі 4 жолды ұзартуға ұсыныс берілген. Дегенмен, Жезқазған – Бейнеу темір жол ашылғалы, мұнда пойыздардың келуі азайып, ұзын пойыздар уақытша қиындық тудырмауда. Бұл бекетте 16 жолы бар, оның 6 жолында вагондар сұрыпталады. Қызылордаға кететін құрамды дайындағанда, әр разъезден қалдырып кету үшін вагондарды соңынан бастап құрайды. Жолай шағын станцияларға тоқтаған сайын машинист ағытып кетеді. Бұрнағы жылдары станцияда пойыз көбейгенде станция кезекшілері басқа жолға пойыз қабылдау үшін, ұзын пойыздардың вагонын ағытып, басқасына жалғап, кейін қайта өзіне қосып әуреге түсетін. Себебі, бұл бекеттегі жолдардың ең ұзыны 68 метрді құрайды. Қалғандары 57-58 метрге жетеқабыл. Ал ұзын пойыздар көбейгенде 71 метрге жетіп, жоғарыда айтқанымыздай, үш жолды жауып қалады. Қазір де жолдарды ұзарту жұмысы кейінге қалып отыр. Тек, бүгінде тастанды пойыздардың тоғытылып тұруы сирек болғандықтан, станцияға келетін ұзынқұрамды пойыздар да азайған. Себебі, Жезқазған – Бейнеу жолы ашылған соң, Түркістан арқылы өтетін пойыз саны 30 пайызға азайыпты. Яғни, 2015 жылы жүк пойыздарының келуі 2014 жылмен салыстырғанда 50 пайызға төмендеген. Алдыңғы жылдары тәулігіне 13-14 пойыз қабылданып-жөнелтілсе, бетбақдалаға жол тартылған соң, бұл меже тәулігіне 7-8 пойызды көрсетуде. – Жыл соңында пойыздарды Өзбекстанға өткізу қиындық тудырады. Қазірден өзбектер пойызды аз алып жатыр. Ал, Сарыағаштан тәулігіне 17-18 пойыз жөнелтуге дайын тұрады. Қаңтар-ақпанға дейін тастанды пойыздар көбейеді. Арыстың жолдары толып қалған соң, біздің пойыздар Ақтөбеге дейін, Түлкібастан Шуға дейін тоқтап тұрады. Оның экономикалық шығыны да бар. Қазір жағдай дұрысталғанмен, келешек үшін ұзын жолдар салыну керек. Өйткені, күні ертең тастанды пойыздардың қиындығы қайта айналып келгенде, станцияда пойыздар қаптап, келген құрамдарды қабылдау қиындық тудырады. Оның үстіне талапқа сай пойыз бағыттағыш бұрманың үстінде тұрмау керек. Бұл станция кезекшісінің жұмысына да қолайсыздық тудырады. Бір жылдан бері жаңа әдіске сай пойыздар 25-40 минуттан ғана аялдауда. Вагондардың жағдайын Арыс пен Шиеліде толықтай қарайтындықтан, біздің вагон қараушылар тек ауасын тексеріп жібереді. Бұрынғыдай әр дөңгелекті балғамен ұрып жүрмейді. Жүк пойыздарының тұруына 40 минут берілгенмен, Арыс станциясы уақытылы алмауына байланысты, біз вагонды ағытып, қайта жалғап әуреге түсеміз. Сөйтіп, 1,5-2 сағатқа дейін тұрып қалады. Ал сыр елінен еш кедергі жоқ, пойыздар зулап кетіп жатыр. Тіпті жолаушылар пойызы 15 минут қана бөгеледі. Станция кезекшісі де әр пойыздың тұру уақытын біліп отыратындықтан, келесісін қабылдау үшін қиналмай есептеп отырады. Түстен кейінгі ауысымның соңында пойыз көбейеді. Біздің станция кезекшілері қазір тек Арыстың жолдарында пойыздың толып қалуына байланысты қиналады, – дейді бекет бастығы Қадыр Сырлыбеков.

Жолдарды ұзарту қажет

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл