Маңғыстау-Семей пойызында да әйелдер вагоны бар
Маңғыстау облысы бойынша меншікті тілші
Ақпан айынан бастап Маңғыстау-Семей бағытындағы жолаушылар пойызында да әйелдер вагоны қатынай бастады. Аталған құрамның тоғызыншы вагоны енді нәзік жандар үшін қызмет етеді. Онымен жүретін қыз-келіншектер өзімен бірге тек жеті жасқа дейінгі ер балаларын алып шығуына болады.
Түбектен жолға аттанған бұл бағыттағы алғашқы вагон ақпан айының екінші күні Маңғыстау станциясынан жөнелтілді. Өңірімізден Семей бағытына екінші сапарына аттанғалы тұрған пойыздың тоғызыншы вагон жолаушыларымен тілдесу мүмкіндігі туды. Жергілікті тұрғындардың бірі елордада жоғары оқу орнында оқитын қызын шығарып салуға келіпті. Әйелдер вагоны жүрді дегенде ерекше қуанған ол қызының оқуына барып келуі бұған дейін тәп-тәуір мәселе болғанын айтады.
Әйтекеби станциясына бара жатқан Нағима Бикебаева да әйелдер вагонының «ғұмыры» ұзақ болса деп тілейді. Пойыз келгенше әйелдер вагоны екенінен хабарсыз болған ол, жолсеріктер күтіп алғанда ғана біліпті.
Бұл вагонда жолаушыларға өзге вагондардағы сияқты екі жолсерік қызмет көрсетеді. Біреуі – Алматы-Маңғыстау, Маңғыс- тау-Нұр-Сұлтан, Маңғыстау- Астрахан, Маңғыстау-Қоңырат бағыттары бойынша 26 жылдық еңбек өтілі бар Нұрсұлу Қабдрах- манова.
Еске сала кетсек, бұл – түбек теміржолына қатынайтын екінші әйелдер вагоны. Қазан айынан бері Маңғыстау-Алматы бағы- тындағы жолаушы пойызының жетінші вагоны қыз-келіншектер үшін қызмет көрсетуде.