Астана – Бурабай жаңа жылдық электр пойызы жолға шықты (+фото)

Жаңа 2023 жыл қарсаңында елордадан Бурабайға дейін мерекеге сай безендіріліп, боялған жаңа пойыз жолға шықты. «Жолаушылар тасымалы» АҚ Щучинск-Бурабай курортты аймағына жайлы да тартымды жаңа жылдық электр пойыздарын іске қосты, деп хабарлайды Rail-news.kz.

Жолаушыларға мерекелік көңіл-күйді сезіндіру үшін жылжымалы құрам ұлттық және жаңа жылдық стильде безендірілді. Жарқыраған гирляндылар, жасанды қар бүршігі және шарлар ілінді. Вагондардың ішіне қазақстандық қолөнер шеберлерінің еңбектері көрік берді. Қолмен киізден жасалған декоративті паннолар мен жастықтар мейрам лебін ерекше сезіндіре түседі. Пойыз вагондарына Аяз Атаға хат жолдау үшін арнайы жәшіктер қойылған.

Осындай мерекелік пойыздар Астана –Көкшетау бағытымен 2023 жылғы қаңтар айының соңына дейін саяхаттаушыларды күн сайын тасымалдайтын болады. Экспресс пойыз 2022 жылы 22 желтоқсанда таңғы сағат 06.03-те «Нұрлы жол» вокзалынан аттанды. Елорда тұрғындары мен қонақтарына қолайлы болуы үшін аталған пойыз Астана-1 станциясында да аялдайды. Бұл станцияға пойыз таңғы сағат 6.28-де жетіп, 6.57-де жүріп кетеді. Жолда пойыз үш станцияда, яғни Ақкөл, Елтай және Макинкада тоқтады. Арадағы уақыт тез өтіп кетеді. Таңертең 9.51-де за Бурабай курорты станциясына жетіп барады.

- Бүгін бірінші рет осындай әдемі пойызбен демалуға бара жатырмын. Жаңа жыл алдындағы көңіл-күй керемет. Оның үстіне мынадай вагонда мейрамды қатты сезінеді екенсің. Осы игі істі жүзеге асырған азаматтарға алғысым шексіз. Себебі адамға бақытты болу үшін көп нәрсе керек емес, жайлылық пен өзіне көңіл бөлуді байқаса, соның өзі мерейіңді өсіреді. Ал мына жаңаша жасанған пойыздарда сондай ықыласты сезініп келеміз, - дейді елордалық жолаушы Жәния Әлжаппарова. 

Жаңа жылдық экспресс — «Жолаушылар тасымалы» АҚ, «Бурабай Даму» ЖШС, ҚР Президенті істері басқармасы, мәдениет және спорт министрлігі, «Kazakh Tourism» ұлттық компаниясының бірлескен жобасы. Бұл жоба ішкі туризмді дамыту мақсатында жүзеге асырылып отыр. Сонымен қатар электр пойыз жолаушыларына «Бурабай Даму» ЖШС «Burabay Land» отбасылық ойын-сауық паркіне баруға бір күндік тур бағдарламасын да ұсынады. Сондай-ақ Бурабай курортты аймағының көрнекі орындарын аралау мүмкіндігі беріледі. Атап айтқанда, олардың қатарында визит–орталық, зообұрыш, Абылайхан алаңындағы мультимедиалық интерактивті кешен, «Бурабай» емдеу орталығы сынды орындар бар.