ҚТЖ billet.railways.kz сайтында жаңа функцияны іске қосты
«Жолаушылар тасымалы» АҚ жолаушылардың билет рәсімдеу барысында толық әрі дер кезінде ақпарат алуын қамтамасыз ету мақсатында billet.railways.kz сайтында жаңа функцияны іске қосқанын хабарлады.
Енді №23/24 «Ақтөбе – Алматы», №33/34 «Ақтөбе – Алматы», №614/613 «Орал – Маңғыстау» бағыттарындағы үш қабатты төсек орналасуы бар пойыздарға билет сатып алғанда немесе брондағанда, сайтта плацкарт вагондарда үшінші сөренің бар екенін ескертіп, арнайы хабарлама шығатын болады. Ал үшінші сөрені таңдау кезінде қосымша растау терезесі шығып, жолаушының шешімін нақтылау ұсынылады:
«Құрметті жолаушы! Сіз таңдаған орын – үшінші сөре. Келіссеңіз, «OK» түймесін басыңыз.»
Сондай-ақ, billet.railways.kz сайтында билет рәсімдеу барысында жолаушылар үшінші сөренің орналасуын және вагонның ішкі құрылымын көрсететін бейнежазбаны көре алады.
Жаңа функцияның арқасында жолаушылар билет сатып алмай тұрып, вагонның орналасу тәртібімен танысып, қажетті ақпаратты алдын ала біле алады. Бұл сапар кезінде күтпеген жайсыз жағдайлардың алдын алуға көмектеседі.
