“Алматы-3” теміржол вокзалының құрылысы: Жоба қай кезеңде?
Алатау ауданынының “Мәдениет” шағын ауданынан оңтүстікке қарай жаңа "Алматы-3" жолаушылар вокзалын салу жоспарланып отыр. Жобаға сәйкес, вокзалдың өткізу қабілеті 2027 жылға қарай тәулігіне 1,12 миллион адамға жетіп, 2040 жылға қарай 1,97 миллион адамға дейін өседі, деп хабарлайды Rail-news.kz сайты BAQ.KZ сілтеме жасап.
Жаңа "Алматы-3" вокзалы іске қосылған соң, ол "Алматы-2" вокзалының оңтүстік және батыс бағыттардағы жолаушылар ағынын қайта бөлуге мүмкіндік береді. Дегенмен, "Алматы-1" және "Алматы-2" вокзалдары өз жұмысын жалғастыра береді. Жаңа вокзалдың жолаушылар ағыны 2027 жылы 1,12 миллион, ал 2040 жылы 1,97 миллион адам болады деп жоспарлануда.
Қазіргі уақытта Алматы қалалық мобильділік басқармасы «Алматы-3» вокзалын Бұрындай-Ақсеңгір аралығында салу бойынша техникалық-экономикалық негіздеме (ТЭН) әзірлеу жұмыстарын жүргізіп жатыр. Вокзал жолаушылар мен жүк тасымалына арналған станция ретінде дамытылады. Құрылыстың нақты мерзімі ТЭН дайын болғаннан кейін белгілі болады.
Бұл жоба аясында қала маңы және қалалық автобустарға, жеңіл рельсті көлікке (LRT), жеке көлік пен таксилерге арналған аялдамалар қарастырылатын көлік-транзиттік торап ұйымдастыру жоспарлануда. Жобаның қаржылық параметрлері, соның ішінде нақты құны, қаржыландыру көздері, мемлекеттік қолдау шаралары мен инвестиция көлемі ТЭН аяқталған соң айқындалады, — делінген ресми хабарламада.
Сонымен қатар вокзал маңында көгалдандыру аймағы, жаяу жүргіншілер жолдары мен велосипед жолақтары салынып, коммерциялық нысандар орналастырылады.