Пойыздағы 25 күн: Қазақстанның барлық өңірін аралаған саяхатшы
Ақтөбе облысы бойынша меншікті тілші
Надежда Швец небәрі 25 күн ішінде Қазақстанның барлық өңірін пойызбен аралап шықты. Турист пойызды қауіпсіз көлік ретінде таңдаған.
Надежда Швецтің айтуынша, 21 наурыз күні жолға шыққан Рудный қаласының тұрғыны бір қаладан екінші қалаға тек пойызбен қатынап, 14 сәуірге дейін Қазақстанның барлық өңірін аралап үлгерген. Ол тарихи-мәдени және туристік нысандарды тамашалаған.
«Пойызбен аралауды таңдадым. Себебі жайлы әрі қауіпсіз. Кейбір билеттерді акциямен тым арзанға алдым. Қапшағай мен Алматы арасына билет құны 600 теңгеге шықты. Ең қымбатқа алған билетім – «Жезқазған-Ақтау» бағыты болды, 10 мың теңгеге шықты. Саяхат қызықты болды. Жолда көп адаммен таныстым. Қазақстанды пойызбен жалғыз аралаған алғашқы әйел ретінде Қазақстан рекордтар кітабына өтінім бердім», – дейді саяхатшы.
Сапар барысында ол тек плацкарт вагондарын таңдап, жолай түрлі адамдармен танысып, әңгімелескен. Айтуынша, Қазақстанды саяхаттау туралы идеясын жолдасы қолдап, екі баласын алып қалған.
Надежда сапарын Солтүстік Қазақстаннан бастап, батыс өңірінде аяқтады. Ол Қазақстанның әр өңірінен ерекше әсер алған. Қарағандыда Наурыз мерекесін өткізеді. Көкшетауда табиғатты тамашалаған. Петропавлда ботаникалық баққа, Павлодарда мамонт сүйектеріне, Таразда көне базарға, Ақтөбеде планетарийге барып, ерекше әсер алған.
