Жүргізушілерге жадынама таратты
"Қазақстан теміржолшысы" газетінің Жамбыл облысындағы меншікті тілшісі
Жамбыл облысы аумағында күзетілетін және күзетілмейтін барлығы 70 теміржол өткелі бар. Алайда бүгінде автокөлік жүргізушілері өткел талғамайтын болған, соңғы уақытта жүргізушілер тарапынан кез келген өткелде жол ережесін бұзу фактілері артқан.
Сондықтан сала мамандары көлік тізгініндегілерге теміржол өткелдерін кесіп өтудің талаптарын еске салу мақсатында құқық қорғау органдарының қызметкерлерімен бірлескен рейдтерді жиі өткізуде.
«Заң мен тәртіп» тұжырымдамасы аясында осындай ауқымды профилактикалық іс-шараны Жамбыл магистральдық желі бөлімшесі мен ТЧЭ-31 Жамбыл локомотив пайдалану депосы бірлесе ұйымдастырды.
Теміржол өткелдерінде жүргізілген профилактикалық рейдтік іс-шараларға Жамбыл көлік прокуратурасы, Тараз қаласының патрульдік полиция батальоны және Тараз станциясындағы Көліктегі полиция бөлімінің қызметкерлері қатысты. «Қауіпсіз өткел» акциясы Тараз қаласындағы теміржол вокзалынан басталды. Сала мамандары жолаушылар мен тұрғындарға қауіпсіздік шараларын сақтау, темір жолды белгіленген жерден кесіп өту талаптарын түсіндірді.
– Тараз қаласындағы «Тараз – Талас» учаскесінің 3515 шақырымында күзетілетін өткел бар. Бұл учаске арқылы тәулігіне 32 жұп жүк пойызы және 18 жұп жолаушылар пойызы өтеді. Ал «Тараз – Бурыл» бағытындағы 4 және 5, 11-өткелдерде де автокөлік ағыны жоғары. Әсіресе «Ауыл береке» базары маңындағы 5-шақырымдағы өткелден күн сайын 18 мыңға жуық көлік қатынаса, автобустар 466 рет темір жолды кесіп өтеді. Орталық базарға жақын орналасқан 11-шақырымдағы күзетілмейтін өткелде де толас жоқ. Сондықтан рейдті осы өткелдерде өткіздік, – дейді Жамбыл магистральдық желі бөлімшесі Жол бөлімінің бастығы Ғалымбек Батырбеков.
ТЧЭ-31 Жамбыл локомотив пайдалану депосының өндірістік қауіпсіздік секторының бастығы Әділет Түлековтің айтуынша, соңғы уақытта пойызды шұғыл тоқтату жағдайлары жиілеген. Жыл басынан бері машинистер бригадасы бірнеше мәрте кәсібилігі мен қырағылығының арқасында жол-көлік оқиғаларының алдын алып, жолаушылар өмірін қатерден сақтап қалған.
«Көлік жүргізушілері бағдаршамның қызыл түсі жанып, белгі берілгеніне қарамастан шлагбаумды айналып өтуге тырысады. Ауыр вагондарды тіркеген пойызды бірден тоқтату мүмкін емес. Оның тежеу қашықтығы бірнеше жүздеген метрді құрайды, сондықтан төтенше тежеу кезінде де жүргізуші соқтығысудың алдын ала алмай қалуы мүмкін», – деп түсіндіреді Әділет Түлеков.
Тараз қаласының патрульдік полиция батальонының полиция аға инспекторы, полиция капитаны Ілияс Мыңбол бағдаршамның қызыл түсі жанып, белгі берілгенде екінші жолаққа шығып, шлагбаумды айналып өтуге тырысқан көлік жүргізушілеріне ҚР «Әкімшілік құқық бұзушылық туралы» Кодексінің 607-бабы бойынша хаттама толтырылып, айыппұл салынатынын айтады.
Рейд кезінде патрульдік полиция және Тараз станциясындағы Көліктегі полиция бөлімінің қызметкерлері, Жамбыл көлік прокуратурасының прокуроры Ерболат Тамаев көлік иелеріне шлагбаум жабылған сәттегі іс-әрекеттер алгоритмін түсіндірді. Жалпы акция барысында 250 көлік жүргізушісіне қауіпсіздік талаптары жазылған жадынамалар таратылды.