Бүгінгі ұрпақ – ертеңгі ел үміті
Ақтөбе облысы бойынша меншікті тілші
«ҚТЖ-Жүк тасымалы» Батыс аймақтық филиалының басшысы Бөріхан Беркімбаев теміржолшылар отбасында тәрбиеленіп жатқан бүлдіршіндерді халықаралық балалар күнімен құттықтады.
«Жаздың алғашқы күнімен келетін мерекені балдырғандарымыз жыл сайын асыға күтеді. Біз де күтеміз. Ата-ана үшін бақыт – баланың азамат болып өсуі, мелекет пен қоғамның басты мақсаты – Отаншыл ұрпақ тәрбиелеу. Бүгінгі ұрпақ – ертеңгі ел үміті. Балаға білім беріп, тәрбиелеу, мүмкіндігін ашу бәріміздің міндетіміз. Балақайлар, аспандарың ашық, болашақтарың жарқын болсын. Жүздеріңнен күлкі, жүректеріңнен мейірім кетпесін», – деді Бөріхан Беркімбаев.
Филиал басшысы мерекеге орай Астана қаласында ұйымдастырылған сурет байқауында жүлделі орынға ие болған балаларды да құттықтап, әлемге әдемі көзбен қарайтын қиялы шексіз жас өрендерге суретті кітапшалар сыйлады.
