Сырбойылық теміржолшылар күзгі сенбілікті бастап кетті (Фото)
Қызылорда облысы бойынша меншікті тілші
Тазалығын табалдырықтан бастайтын сырбойылық теміржолшылар күзгі сенбілікті бастап кетті. Экологиялық мәдениетті қалыптастыруды қаланың бас қақпасынан бастады.
Теміржол вокзалы маңында ұйымдастырылған аймақтық сенбілікке Қызылорда магистральдық желі бөлімшесінің директоры Ибраким Басықараев, орынбасарлары Ербол Оңғарбаев, Нұрлан Бимұратов, Қызылорда қосалқы бөлім басшысының орынбасары Бекжан Өтеулиев пен бас инженер Күлхан Белкібаев және Қызылорда станциясындағы барлық салалық мекемелердің басшылары мен қосшылары түгел атсалысып, вокзалдың айналасын, перрон мен жолаушылар пойыздары аялдайтын станциялық екі жолға дейін тазалап, ауқымды сенбілік өткізді. Яғни шараға станциядағы салалық мекемелердің (НЖС, НОДГП, ПП, ПЧ, ЭЧ, ШЧ, Вагонсервис, ТЖС-Кызылорда) толық қатысуын ескерсек, сенбілікті аймақтық деңгейде өткізілді деуге әбден болады. Және мұндай сенбілік Қызылордамен шектеліп қалмай, өңірдегі өзге станцияларда да жалғасатын болады.
– Биыл Қызылорда вокзалы жөндеуден өткізіліп, жаңа түрге еніп, жаңарып жатқандықтан оның айналасының да соған сай экологиялық таза болып, көзге оғаш көрінбеуі үшін аймақтық сенбіліктің осында өтуі өте игілікті іс болды. Барлық теміржол мекемелері бір кісідей қатысып, үлкен жұмыс атқарылды. Таңертеңнен бастап әр мекеменің теміржолшылары өздеріне белгіленген жұмыспен айналысып, вокзал маңы, перронға қоса жылжымалы құрамдардың жүрісіне кедергі келтірілмей, жолаушылар пойызы аялдайтын екі жолға дейін тазартылды, дәл осындай жұмыстар алдағы уақытта аймақтарда да өтетін болады, – деді вокзал шаруашылығы басшысы Нұрлан Бимұратов.
