Әкім ҚТЖ ұйымдастырған семинарға қатысты
«Қазақстан теміржолшысы» газетінің тілшісі
Маңғыстау облысының әкімі Нұрдәулет Қилыбай «Қазақстан темір жолы» ұлттық компаниясы ұйымдастырған семинар-кеңеске қатысты.
Іс-шара теміржол көлігі қозғалысының қауіпсіздігіне байланысты мәселелерді және оларды шешудің жаңа тәсілдерін талқылауға арналды. Семинарға ҚТЖ Қозғалыс қауіпсіздігі департаменті басшысының орынбасары Ниязбек Жаңабаев, Маңғыстау жүк тасымалы және магистральдық желі бөлімшелерінің директорлары, көлік саласындағы құқық қорғау органдары, облыстық мәслихат өкілдері, сондай-ақ еліміздің әр өңірінен келген пойыз қозғалысының бас ревизорлары қатысты. Теміржолшылар бас қосқан жиында көлік қауіпсіздігін нығайту, инфрақұрылымды жаңарту және темір жол ревизорларының қызметін оңтайландыру жолдары талқыланды.
Өңір басшысы Нұрдәулет Қилыбай темір жолдың қауіпсіздігін қамтамасыз ету мәселесіне тоқталып, саланың өңір экономикасына тигізетін оң әсерін атап өтті.
– Болашақта өңірде теміржол тасымалы артады деген үмітіміз зор. Алдағы уақытта жаңа вагондар алу бойынша жұмыстар атқарылып жатыр. Бұл ел экономикасының дамуына серпіліс береді. Теміржол саласы мамандарының жұмысы үлкен жауапкершілікті талап етеді, – деді Нұрдәулет Қилыбай.
Жиын қорытындысы бойынша теміржол көлігі қозғалысының қауіпсіздігі және жүйелік мәселелерді шешуге арналған ұсыныстар қабылданды.