Қысқа әзірлік қарқынды жүргізілуде

Ел шығысында алдағы қысқы маусымға даярлық шарасы үлкен қарқынмен басталып кетті. Бұл ретте Астанадан жеткен №482ЦЗ бұйрығы аясында Семей ЖТ бөлімшесінің басшысы Алмас Сейсемқановтың тікелей назарға алуымен қыркүйектің 8-ші жұлдызынан бастап қысқы маусымға даярлықтың стандарты бойынша қауырт жұмыстар жүргізілуде.

Бұл бағыттағы шаралар алдағы қазан айының 10-шы жұлдызы күні толықтай аяқталуы тиіс. Ал оның жүргізілу барысы осы айдың 17-і күні басталып, келергі айдың 3-і күні аяқталатын күзгі комиссиялық бақылау барысында қатаң түрде қадағалауға алынады.  

Міне, осынау орайда бөлімшеге қарасты материалдық-техникалық жабдықтау базаларындағы қоймалар, өндірістік үй-жайлар, гараждар, сонымен қатар қармен күреске қолданылатын техникалар толықтай талапқа сай етілуде.  

Ал осыған дейін арнайы киім, жол машиналары үшін қосалқы бөлшектер мен жабдықтар, құрал-аспаптар алынып, қамданыс жасалды.  

Қазіргі таңда қысқа даярлық шараларын пысықтайтын арнайы топ құрылып, желі бойында жүйелі жұмыс жүргізуде. Комиссия төрағасының орынбасары, Семей магистральдық желі бөлімшесінің бастығы Айдын Шәукежанов желі бойындағы бүгінгі күнге дейінгі атқарылған шараларды пысықтауда.  

Қазіргі күні нақтылағандай, бөлімшедегі материалдық-техникалық жабдықтау базасы қалыпты жұмыс істеп тұр. Сонымен қатар желі бойында қолданылатын техникалар саны да жеткілікті. Осы орайда желі бойындағы тораптық станциялардағы көмірмен қамту мәселесі бірінші кезекте назарға алынған. Арнайы техникалық көмір қоры жасақталуда. НЖС-6-ға қарасты 234 үймерет әзірлік шараларының соңғы кезеңінде тұр. Тек Семей, Аягөз бен Шар станцияларындағы теміржол вокзалдарын қайта жаңғырту жұмыстарын қадағалап, ширату қажеттілігі туындауда. Құрылыс барысы белгіленген кестеден кешікпеуі қажет. Жол шаруашылығындағы нысандарға ерекше көңіл бөлінген. ПЧ-39, ПЧ-40 және ПЧ-42 мекемелеріне қарасты нысандар жазғы мезгілде жөндеуден өткізілді. Теміржолшылардың жылыну үйшіктері қайта жаңартылып, жолшыларға қажетті техникалық жабдықтар да жаңаланған. Мәселен, пневмообдувкалардың 366 бірлігі тастүйін дайын. Ендігі аралықта желі бойындағы шаруашылықтар мен мекемелердің қысқа даярлық жұмыстары Аягөз, Шар мен Семейде өтетін тораптық жиындарда жеке қаралатын болады. Қазіргі уақытта қажетті материалдар мен құрал-жабдықтарды, арнайы киімдерді жеткізу, жетпегенін толықтыру іс-шараларын жүргізуде.