Облыс әкімі теміржолшылар әулетін марапаттады

Маңғыстауда Жұмысшы мамандықтар жылының ресми жабылу салтанатында облыс әкімі Нұрдәулет Қилыбай теміржолшы Тоғызбаевтар әулетін марапаттады.

– Еңбек адамы – ел мақтанышы. Жұмысшы мамандықтары – кез келген мемлекеттің индустриялық дамуының өзегі. Сондықтан жұмысшы мамандықтарына биыл ғана емес, жыл сайын жоғары деңгейде көңіл бөлінуге тиіс. Құрылыс, өндіріс, көлік, энергетика, ауыл шаруашылығы сияқты негізгі салалардың сапалы жұмыс істеуі – білікті жұмысшылардың қолында. Жастар еңбек жолын қарапайым жұмыстан бастап, тәжірибемен шыңдалып, содан кейін кәсіби деңгейін көтеруі қажет. Ең бастысы адал еңбек әрқашан бағаланады. Сіздердің еңбегіңіз – өңірдің тірегі, Маңғыстаудың дамуының негізі, – дей келе облыс әкімі кәсіби мамандарға алғысын айтып, марапаттарын табыстады.  

Жұмысшы мамандықтар жылының өңірлік қорытындысы ретінде ұйымдастырылған бұл іс-шараға өңірдің әр саласында абыройлы еңбек етіп, кәсібін ұрпақтан-ұрпаққа мирас еткен оннан астам еңбек әулеті қатысты. Солардың бірі – теміржолшы Тоғызбаевтар династиясы. Жалпы еңбек өтілі 150 жылдан асқан әулетте қазір үшінші ұрпақ бұл жолды жалғауда. Теміржолшылар династиясының негізін қалаған Қойшыбай Тоғызбаев түбек теміржолының ілкі жылдарынан бастап Маңғыстау локомотив депосында еңбек еткен. Отыз бір жыл темір жолда тер төккен ол ұл-қыздарын да ізін басар кәсіби мамандар етіп тәрбиелеген. Бүгінде екі ұлы мен үш қызы осы салаға қызмет етіп, маңдай терімен нәпақасын тауып жүр. Үлкен қызы Орынгүл техникалық қызметкер болса, екінші Бақтыгүлі депода жедел-техникалық есептеу бөлімінің басшысы. Назгүлі «КаскорТрансСервистің» есепке алу бөлімінде. Ортаншы ұлы Бақтияр мен кенжесі Данияр екеуі де депоның тепловоз машинисі.  

– Ес білгелі әкем теміржолшы болып жұмыс істеді. Бәріміз ол кісіге қызығып, мамандығын таңдауды армандадық. Қазір біз балалары мен немерелері әкеміз еңбек еткен депода, әке мен ата жолын жалғастырып, әке абыройын асқақтатудамыз. Мамандығымыз – мақтанышымыз. Өзім бұл жолды таңдағаныма еш өкінген емеспін. Темірдей тәртіпке бағынып, ұқыпты болуды үйрендім, – дейді Бақтыгүл Қойшыбаева.