Жолсапар сәттілігі үйдегі көңіл-күйден басталады

Теміржол көлігін тізгіндеушілердің отбасы мүшелерінің қауіпсіздікке қосар үлесі орасан. Сондықтан олар да теміржолшылар секілді кейбір мүмкіндіктерге ие және өздеріне белгілі бір деңгейде жауапкершілік жүктейді.

Өйткені машинист пен машинист көмекшілерінің жолсапары сәтті болуы ең алдымен оның көңіл күйіне байланысты. Ал олардың жұмысқа ұйқысы тыныш болып, жақсы тынығып, жан тыныштығымен аттануына жағдай жасайтын кім? Әрине отбасы, ошақ қасындағы жұптары – жұбайлары.  

Жақында Маңғыстау локомотив пайдалану депосында депо басшылығы мен кәсіподақ ұйымының ұйымдастыруымен локомотив бригадалары мүшелерінің өмірлік серіктерімен, кейбірінің аналарымен кездескен басшылық олардың машинистер жұмысындағы рөлінің маңызын жоғары бағалап, жұмысқа кетер алдындағы жағымды көңіл күйін қалыптастырып, ас-суын дайындап шығарып салатын жандарға алғыс айтты. Депо бастығының орынбасары Руслан Төлепбергенұлы мен Маңғыстау аймағындағы локомотив шаруашылығы бойынша ревизор Серік Төлен депо басшылығы мен кәсіподағы атынан оларды алғыс хатпен марапаттап, естелік сыйлықтар табыстады.

– Жолсапарға аттанып бара жатқан адамға отбасындағы көңіл-күй ерекше әсер етеді, анаңның, жарың мен балаларыңның уайым-қайғысыз ойнап-күліп шығарып салуы кім-кімге де жан тыныштығын сыйлайды. Жол үстінде түрлі мәселемен хабарласып, уақытын алып, үйдегі проблемаларды айтып, назарын аудармауға тырысқан жөн, ол машинистің жұмысқа көңіл аударуын әлсірету деген сөз. Машинист қателікке бой алдырып, қауіпсіздікке нұқсан келуі де мүмкін. Сол үшін отбасы мүшелерімен кездесуде машинистер мен машинист көмекшілерінің кезекті рейске аттанар алдында дайындығының дұрыс болуын, демалуын қадағалап, жақсы атмосфера қалыптастыру қажеттігін түсіндірдік. Оларға берілетін жеңілдіктер мен төлемақылар туралы айттық, – деген депоның кәсіподақ ұйымы төрағасы Әбілсейіт Нәбихановтың айтуынша, локомотив бригадаларының отбасы мүшелеріне де біраз жеңілдік бар екен.  

Олар бірінші тоқсан мен төртінші тоқсанда Бурабайдағы С.Сейфуллин шипажайына барып демалуға болады. Үш жасқа дейінгі баласы бар декреттік демалыста отырған әйелдерге жол жүру билеттері төленеді. Ерлерімен қатар «Медикер» медициналық мекемесіне қаралуға құқылы. Егер әйел жұмыс істемейтін болса, олардың ақылы ота жасатуы немесе басқа да ақылы еміне кәсіподақ атынан жартылай болса да қаражатын көтеру қарастырылған.  

Еске сала кетсек, Маңғыстауда айналым деполарын қосқанда машинист пен машинист көмекшілерінің саны бес жүзден асады. «Бақ, қайда барасың?» десе, «Ынтымаққа барамын!» деген екен дейді халық тәмсілі. Демек, Бақ тұғыры – ынтымақ! Теміржол көлігінде жауапты тұлға машинистер отбасында тек бақ пен береке салтанат құрсын деген тілекпен тарасты жиналғандар.