Достық – мүмкіндіктер мекені

«ҚТЖ-Жүк тасымалы» ЖШС Достық станциясының жүк және багаж қабылдап-жөнелтушісі Серік Рахметжанов – 32 жылдық тәжірибесі бар теміржолшы ғана емес, жүк қабылдау ісін жетік меңгерген маман.

Міне, 15 жылға жуықтады, күн сайынғы қызметімен Қазақстан арқылы Қытайдан Еуропа және Орталық Азия елдеріне және Ресейге өтетін транзиттік тасымалдың қауіпсіз әрі сенімді орындалуына үлес қосып келеді. Шекара төсіндегі станцияға сонау жаңадан ашылған жылдары, 1992 жылы келген. Еңбек жолын пойыз құрастырушы болып бастады. 2012 жылы қазіргі қызметіне ауысып, теміржол саласында жоғары білім алып, кәсіби деңгейін арттырды.

Жалпы, 1968 жылы Жетісу облысында көп балалы отбасын да дүниеге келген кейіпкеріміз жастайынан еңбекке пісіп өскендіктен, жұмыстан ешқашан бас тартқан емес. Сондықтан жауапты, тиянақты маман қай жұмыста да сыйлы болды. Табанды еңбегі бағаланып, «Адал еңбегі үшін» төсбелгісімен марапатталды. Әйелі де осы станцияда оператор болып істейді. Оның да теміржолдағы еңбек өтілі 30 жылдан асқан. Ерлі-зайыпты теміржолшылар екі бала тәрбиелеп отыр. Олар үшін осы бір табиғаты қатал, қысы аса ызғарлы, жазы аптап ыстық өңірге бауыр басқандары сонша, басқа жаққа қоныс аударуды ойламайды да. Ол үшін Достық – үлкен мүмкіндіктер мекені. Биыл кәсіби мереке қарсаңында компания басшылығы тарапынан елордаға шақырту алған теміржолшыны тағы бір табыс баспалдағы күтіп тұрғаны анық.

– Қытайдан келген жүк вагондарын Достықта қабылдап, қайта тиеп, межелі станцияларға жібереміз. Тәулігіне 500-600 вагондай жүк тиеледі. Оның ішінде ашық, жабық, контейнерлік вагондар бар. Қазіргі таңда контейнерлер бойынша тәулігіне 800-1000 вагондай тиеп, жөнелтіледі. Ел экономикасын дамытуда, Қазақстанның транзиттік әлеуетін күшейтуде және ТХКБ бағдарының басты жолы ретінде бізге үлкен жауапкершілік жүктелетінін білеміз, сол бағытта жауапкершілікпен жұмыс істеп, қозғалыс қауіпсіздігін қамтамасыз етуге атсалыса береміз, – дейді Серік Дауылбайұлы.