Мерейлі марапат
"Қазақстан теміржолшысы" газетінің Жамбыл облысындағы меншікті тілшісі
Бұл темір жол бойында тер төгіп, еңбек етіп жүрген адал еңбек иелерінің мерейі асқан күн болды. Жамбылда теміржолшылардың кәсіби мерекесіне орай салтанатты іс-шара ұйымдастырылып, жыл ішінде табысты жұмысымен көзге түскен сала мамандары марапатталды.
«Көне Тараз» тарихи-мәдени этнокешенінде өткен салтанатқа Жамбыл облысы әкімінің орынбасары Алтай Әлі қатысып, сала мамандарын кәсіби мерекелерімен құттықтады.
«Жамбыл магистральдық желі бөлімшесі» филиалының директоры Асқар Жексенбиев, «ҚТЖ-Жүк тасымалы» ЖШС «Жамбыл» филиалының бас инженері Дүйсенбек Сыдықов, «Қазтеміржолкәсіп» ҚБ Жамбыл филиалының төрағасы Ерболат Жидебаев саланы дамытудағы теміржолшылардың еңбектеріне тоқталып, ортақ мақсат-міндеттерді жүзеге асырудағы құрылымдық бөлімшелердің қызметкерлері жұмысының ерекшеліктері мен оларға жүктелетін жауапкершілікті атап өтті. Жыл ішінде табысты еңбек еткен мамандарды «Құрметті теміржолшы», «ІІІ дәрежелі Теміржол даңқы» медальдары, «Адал еңбегі үшін», «Үздік жас маман», «Үздік вагоншы», «Үздік энергетик», «Үздік жас маман» сынды жоғары кәсіби біліктілігі үшін берілетін және кәсіподақ саласының төсбелгілерімен марапаттады.
Табандылық табысқа жеткізеді. Адал еңбектің ақталып, лайықты бағалануының тағы бір айқын көрінісі – 2025 жылғы «Үздік рационализатор» байқауының жүлдегері, Жамбыл магистральдық желі бөлімшесі Түлкібас жол дистанциясының бас инженері Шәмшидин Дадабаевтың «Құрметті теміржолшы» атануы болды. Ал сала ардагері Жұмағали Мұқашұлының «ІІІ дәрежелі Теміржол даңқы» медалімен марапатталуы – теміржол саласындағы еңбек тәжірибесі және ұрпақтар сабақтастығы, аға буынға деген құрметтің сақталуының белгісіндей жылы қабылданды.
Жалпы бұл күні талапшылдығы мен табандылығының арқасында көзге түскен жүзден астам жамбылдық теміржолшылар түрлі марапатқа ие болды. Салтанатты жиынға шақырту алғандардан бөлек, бөлімшелерде өткен мерекелік іс-шараларда көптеген қызметкерге салалық құрылым басшыларының марапаттары тапсырылды.