Павлодарлық теміржолшылар жас спортшыларға қауіпсіздік ережелерін түсіндірді
Павлодар локомотив пайдалану депосының қызметкерлері жекпе-жек және аралас ұрыс өнері (MMA) клубының тәрбиеленушілерімен профилактикалық кездесу өткізді. Шара «Заң және тәртіп» тұжырымдамасын жүзеге асыру мақсатында ел бойынша өтіп жатқан ҚТЖ-ның «Қауіпсіз теміржол» акциясы аясында ұйымдастырылды, деп хабарлайды Rail-news.kz.
Теміржолшылар балаларға теміржол нысандарының жанында өзін қауіпсіз ұстау ережелерін түсіндірді. Әсіресе, белгіленбеген жерде жолға шығуға, теміржолды тыйым салынған тұстан кесіп өтуге, сондай-ақ рельс маңында ойнауға және серуендеуге болмайтынына ерекше назар аударылды.
Жас спортшыларға қозғалыстағы пойызды бірден тоқтату мүмкін емес екені, ал теміржолдағы кез келген абайсыз әрекет қайғылы жағдайға әкеп соғуы мүмкін екені ескертілді.
Кездесу соңында балаларға теміржолдағы қауіпсіздіктің негізгі ережелері жазылған жадынамалар таратылды.
Балалармен мұндай кездесулер өткізу — теміржолшылар жұмысының маңызды бөлігі. Бұл іс-шаралар өсіп келе жатқан ұрпақтың бойында жас кезінен бастап өз қауіпсіздігіне деген жауапкершілікті қалыптастыруға ықпал етеді.
«Заң және тәртіп» тұжырымдамасын жүзеге асыру аясында ҚТЖ, сондай-ақ, ел аумағында «Қауіпсіз өткел» акциясын да өткізіп жатыр. Теміржолшылар жүргізушілер мен жаяу жүргіншілерге теміржол өткелдерінен өту кезінде ережелерді қатаң сақтау қажеттігін еске салады.