Ардагерлер спортпен айналыспақ
Ақтөбеде темір жол саласының ардагерлері бос уақытын спорт залда өткізу мүмкіндігіне ие болды. Аптаның сәрсенбі күні олар Ақтөбе көлік, коммуникация және жаңа технологиялар колледжінің спорт залында бас қосып, түрлі спорт ойындарын ойнай алады. Ақтөбе жол бөлімшесіне қарасты ардагер теміржолшылар кеңесінің төрағасы Бошық Қуатовтың айтуына қарағанда, кеңестің осы бастамасын теміржолшылар даярлайтын оқу орнының директоры, облыстық мәслихат депутаты Жеңіскүл Мұхаметпайызова бірден қолдаған. – Бүгін волейболдан достық кездесу өткізіп жатырмыз. Алдағы сәрсенбі күндері тек волейболдан емес, сондай-ақ футбол, баскетбол, т.б. спорт түрлерінен кездесулер өткізілмек, – деген Бошық Қуатовтың өзінің де спортқа бір табан жақын екенін айта кеткен жөн. Мүмкіндік болса, күніне бірнеше шақырым жаяу жүргенді жаны сүйетін жан. Асқар Ақтілеу, Ақтөбе