Парижді жайлаған қандала пойыз арқылы Лондонға жетті
Гарри Робертсонның үйінде қаптап кеткен қандаламен күресіп жүргеніне біраз уақыт болды. Бір жылдан астам уақыт бойы ол жақын достары мен туыстарынан оқшауланып, төсегіне жатуға да қорқып жүрді. Бұл туралы ҚазАқпарат жазды.
«Лондонда біреумен бірге пәтер жалдасаңыз, бөлмеңіз бастапқыда сіз үшін тыныштық аралына, ал кейін баруға қорқатын үрейлі мекенге айналады. Өйткені үйге қайтып, төсекке жатқанда қышына бастайсыз», — дейді ол.
Бұл кішкентай паразиттер жұмсақ жиһаз бен оның қаптауышын меншіктеп алған.
Ол сіз ұйықтап жатқанда қаныңызбен қоректенеді, содан кейін теріңіз қышынып, қызыл із қалады.
Химиялық өңдеу өз тиімділігін жоғалтты, себебі қандала оған төзімді болып алған.
«Химиялық заттарды қолданып көрдік, бірақ құтыла алмадық. Көшіп кеттік, төсек-орынның көп бөлігін өртеп, біраз киімімді лақтырып жібердім», — дейді Робертсон.
Осы арада Париж жұрты қандаланың көбейіп кетуіне алаңдаушылық білдіріп отыр. Сарапшылардың шамалауынша, жәндіктер Лондонға Eurostar арқылы таралуы әбден мүмкін.
Eurostar тасымалдаушы компаниясының мәлімдеуінше, ол париждік қандала пойызда таралмас үшін жедел шаралар қолданып жатыр.
Дегенмен, молекулярлық биолог және зиянкестермен күрес бойынша сарапшы Дэвид Кейн Лондонда табылған қандаланың Парижден пойыз арқылы келгенін айтып отыр.
«Төсегінен қандала табылған адамдар бір апта бұрын Eurostar-мен саяхаттаған», — дейді Д. Кейн.