Париж біртіндеп қағаз билеттерді пайдаланудан бас тартуда
2023 жылдың қыркүйегіннен бастап Иль-де-Франс аймағында Transilien және RER желілерінде, метрода, трамвайда және автобуста қара магниттік жолағы бар т+ картон билеттерін (карнет) сату тоқтатылды.
Бұл бастама Париждің Автономды көлік басқармасы (RATP) және Францияның Ұлттық теміржол қоғамы (SNCF) басқаратын барлық 265 автобус және теміржол вокзалдарын қамтиды және машиналарда немесе қолданбалар арқылы толтырылған көлік карталарына көшудің келесі қадамы болып табылады. Бұл бастама 2021 жылдың қазан айында іске аса бастаған.
120 жылдан астам өмір сүрген бір реттік картон билеттері Франция астанасының символдарының біріне айналды. Коронавирус пандемиясына дейін Ил-де-Франс аймағында жыл сайын 550 миллионға дейін билет сатылып келді. Айта кетерлігі жыл сайын осындай 5 млн-нан астам билет қолданылмай, жарамсыз болып қалады екен. Енді қолданысқа енетін электронды билет адамдардың байланысын болдырмайды әрі уақыт үнемдейді.
2023 жылдың 21 қыркүйегіне дейін билеттер жиынтығын сатып алған жолаушылар жол ақысын төлеу үшін оларды пайдалана алады. Парижде 2024 жылдың 26 шілдесі мен 11 тамызы аралығында өтетін Олимпиада және Паралимпиада ойындары кезінде туристердің саяхатын жеңілдету үшін бірреттік t+ картон билеттері әзірше сатылымда қалады. Тек 2024 жылдың соңынан бастап бірреттік билеттерді сату толығымен тоқтатылады.
Жолаушылар t+ электрондық билеттерін Bonjour RATP және Île-de-France Mobilités мобильді қосымшалары арқылы сатып ала алады. Сонымен қатар, жол жүру ақысын билет кассасынан сатып алынған Navigo Easy және Navigo Liberté + қайта толтырылатын көлік карталарымен төлей аласыз.