Иран мен Әзербайжан «Солтүстік – Оңтүстік» халықаралық көлік дәлізі бойынша ынтымақтастықты нығайтуда
2025 жылғы 22 қаңтарда Тегеранда өткен Иран-Әзербайжан үкіметаралық комиссиясының отырысында екі елдің теміржол компаниялары Астара станциясының ирандық бөлігінде жүк терминалын салу және пайдалану жөніндегі стратегиялық ынтымақтастық жоспарына қол қойды, деп хабарлайды Rail-news.kz.
Сол күні үкіметаралық хаттама бекітіліп, оған сәйкес терминалдың 35 га аумақтағы бас жоспары мақұлданды. Құрылыс жұмыстары 2025 жылдың соңына дейін аяқталуы тиіс. Сондай-ақ инвестиция көздері анықталып жатыр.
Терминалдың іске қосылуы «Солтүстік – Оңтүстік» халықаралық көлік дәлізінің өткізу қабілетін толық пайдалануға мүмкіндік береді. Екі ел алдағы 5 жыл ішінде Иран мен Әзербайжан аумағы арқылы транзиттік жүк тасымалының көлемін 15 млн тоннаға дейін арттыруға уағдаласты.
Астарадағы жүк терминалдары Әзербайжан мен Иран аумағында орналасып, көлік дәлізінің батыс тармағының маңызды элементтері болып табылады.
Ирандағы Астара – Решт теміржол учаскесі толық пайдалануға берілгеннен кейін транзиттік жүк ағындары осы терминалдан Парсы шығанағындағы Бендер-Хомейни, Бушир, Бендер-Аббас және Чабахар порттарына бағытталады.
Әзербайжанның Астара терминалы қайта жаңғыртылғаннан кейін шекара өткелінің өткізу қабілеті 10-15%-ға артқан.
Қазіргі уақытта екі жүк терминалы да Әзербайжан темір жолдары (ADY) компаниясының «Оңтүстік жүк терминалы» еншілес кәсіпорнының басқаруында.