Әлемдегі ең жылдам пойыз 453 км жылдамдықты еңсерді
Әлемдегі ең жылдам жедел пойыз CR450 Қытайдағы жоғары жылдамдықты теміржол желісінде алдын ала сынақ сериясын бастады және сағатына 453 км жылдамдықпен жүріп өткен, деп хабарлайды Rail-news.kz.
CR450 пойызының максималды сынақ жылдамдығы – 450 км/сағ, ал коммерциялық эксплуатациялық жылдамдығы – 400 км/сағ. Қазіргі кезде ол Шанхайдан басталып, Чунцин мен Чэнду қалаларына дейінгі оңтүстік-батыс бағытындағы жоғары жылдамдықты теміржолда квалификациялық сынақтан өтіп жатыр, деп хабарлайды «Кэцзи жибао» («Ғылым мен технология газеті»).
Жедел пойыз нөлден бастап 350 км/сағ жылдамдыққа небәрі 4 минут 40 секундта жете алады, ал екі пойыз бір-бірімен жарысып, қосынды жылдамдық бойынша 896 км/сағ рекорд орнатқан.
Бұған дейінгі CR400 пойызымен салыстырғанда, CR450 алдыңғы бөлігінің ұзындығы мен ұшқырлығы артып, вагон биіктігі 20 см төмендеп, массасы 50 тоннаға азайған, бұл аэродинамикалық кедергіні 22%-ға төмендетуге мүмкіндік береді.
Қазіргі кезде CR400 «Фусин» пойыздары 350 км/сағ жылдамдықпен қатынайды.
Техникалық талаптарға сәйкес, CR450 пойызы жолаушылар тасымалына қолданбас бұрын 600 мың км жол жүріп өтуі тиіс.