Alstom Канадаға 313 жолаушылар вагонын жеткізеді

Alstom компаниясы Канаданың мемлекеттік жолаушылар тасымалдаушысы VIA Rail Canada үшін 313 жаңа жолаушылар вагонын шығарады. Келісімшарт құны 4,7 млрд канадалық долларды, шамамен 3 млрд еуроны құрайды, деп хабарлайды Rail-news.kz.

Келісім аясында жаңа вагондарды жеткізумен қатар, оларға 15 жыл бойы техникалық қызмет көрсету және қосалқы бөлшектермен қамтамасыз ету қарастырылған. Бұл жұмыстардың құны шамамен 700 млн канадалық долларға, яғни 435,4 млн еуроға бағаланып отыр.

Жолаушылар вагондары Alstom әзірлеген Adessia платформасы негізінде жасалады. Жобалау және өндіріс жұмыстары толығымен Канададағы кәсіпорындарда жүргізіледі. Вагондар Квебек провинциясындағы Сен-Брюно-де-Монтарвиль қаласында жобаланып, шанақтары Ла-Покатьер зауытында шығарылады. Ал соңғы құрастыру жұмыстары Онтарио провинциясындағы Тандер-Бей қаласында атқарылады.

Жаңа вагондар Канада аумағындағы сегіз бағытта пайдаланылмақ. Олар қазіргі қолданыстағы ескі жылжымалы құрамды кезең-кезеңімен алмастырады. VIA Rail Canada паркінде жасы 77 жылға дейін жеткен вагондар бар.

Тапсырыс бойынша жолаушылар салонының тоғыз түрлі нұсқасы әзірленеді. Олардың қатарында алыс және өңірлік бағыттарға арналған отыратын және жатын орындары бар вагондар, панорамалық терезелері бар вагондар, вагон-мейрамханалар мен багаж вагондары болады.

Жылжымалы құрамды жобалау кезінде Канаданың күрделі климаттық жағдайлары да ескеріледі. Вагондар заманауи жайлылық, қолжетімділік, сенімділік және қауіпсіздік талаптарына сай жасалады.

Ірі тапсырыс Alstom-ның Канададағы кәсіпорындарында бірнеше жүз жаңа білікті жұмыс орнын ашуға мүмкіндік береді.