Қызылордада биылғы жол жөндеу жұмыстары басталды
Қызылорда облысы бойынша меншікті тілші
Қызылорда бөлімшесі бойынша биыл 70,095 шақырым жол күрделі жөндеуден өтуі жоспарланған. Өткен аптада күрделі жөндеу жұмысы бөлімшенің оңтүстігіндегі Сауран-Бесарық-Талап станциялары аралығында басталды, деп хабарлайды Rail-news.kz.
Телімнің 3030-3057 км аралығында 26 шақырым жол жаңадан салынуы керек. Бірінші күні соның алғашқы 2375 метріне су жаңа отандық рельстер төселді.
Тиісті орындардан толаскезге рұқсат берілген бойда телімде жұмыс қызу басталды. УК-25/18 көтергіш-төсегіш кранымен рельс тізбектерін жинау жұмысы екі жақтан басталып, ауыр трактор мен бульдозерлер жол төсемін сүру, тегістеу, нығыздау жұмыстарын жасап жатты. Жол төсемінің технологиялық талаптарға сай болуын қадағалап жүрген мамандар өлшеу құралдарымен ары-бері арақашықтықты есептеп жатыр. Сүрілген жолдың орнын тегістеу жұмысына 2 автогрейдер мен 5 бульдозер жегілген. Жол төсемі қажетті деңгейге дейін тегістелген соң екінші УК-25/18 краны алдын ала әзірленген рельс тізбектерін төсеу жұмыстарына кірісті.
Жол салу жұмыстарымен аймаққа танымал "Integra Construction KZ" ЖШС Батыс дирекциясының бастығы Дәурен Сұл- тамұратов күрделі жөндеу жұмыстарына берілген толаскезді тиімді пайдаланып жатқандарын, телімдерден кесте бойынша өткізілетін пойыздар қозғалысына кедергі болмағанын жеткізді.
Жұмысты ұйымдастыру жауапкершілігі филиалдың жол машинасы станциясының директоры Әмірхан Жолдасбайға жүктелген. Айтуынша, бүгінгі жұмысқа 45 жол жөндеуші, МПД, ПЛ,УК, ЭЛБ, ВПО ауыр жол техникалары, 5 бульдозер, автогрейдер, 5 автокөлік, олармен жұмыс істейтін 30-ға жуық механизатор, қиыршық тас таситын және рельс-шпалды торламаны таситын жылжымалы құрамдар жұмылдырылып, Қалибек Ізбанов, Еркін Аңсатбай, Берік Бектібаев сынды тәжірибелі жол жөндеушілер мен Берік Оспанов, Еркін Жұбаназаров, Сұлтанхан Жүсіпбековтей ауыр жол техникалары машинистерінің сауатты да жауапты іс-әрекетінің нәтижесінде барлық жұмыс талапқа сай сапалы атқарылған. Толаскез барысын Қызылорда жол дистанциясының мамандарынан құралған топ бақылап, қабылдап алды. Алдағы күндері тағы да 4-6 сағаттық толаскез беріліп, жұмыс әрі қарай жалғасатын болады.
