Достық – Мойынты учаскесіндегі екінші жолдарды салу қалай жүріп жатыр
«ҚТЖ» ҰК» АҚ 2022 жылғы қарашада Достық – Мойынты т/ж учаскесінде екінші жолдарды салуға кірісті, деп хабарлайды Rail-news.kz.
Мемлекет басшысының отандық өнімнің үздіксіз экспортын қамтамасыз ету және елдің транзиттік әлеуетін арттыру жөніндегі алға қойған міндеттерін орындау шеңберінде инфрақұрылымдық жобаның маңызы зор. Екінші желі іске қосылғаннан кейін учаскенің өткізу қабілеті 5 есе (тәулігіне 12-ден 60 жұп жүк пойызына дейін) артады.
Бұған дейін атап кетілгендей, жоба оң мультипликативті әсерге ие. 20 жыл ішінде ол Ұлттық қорға 543 млрд теңгені пайызымен қайтарады және бюджетке 4 трлн теңгеден астам салық түсімдерін қамтамасыз етеді. Құрылыс кезіндегі қазақстандық қамту үлесі 85% құрайды.
Құрылыс жұмыстарын ұйымдастыру үшін Балқаш станциясы, Жақсыбұлақ, Үшарал қаласы бойынша үш басқару орталығы іске қосылды. Жарық, Сарықұм, Ортадересин, Шолқызыл, Жақсыбұлақ, Ақтоғай, Үштөбе, Сайқан (Бескөл) станцияларында 8 өндірістік база құрылды. Қазақстандық зауыттармен инертті материалдар, темірбетон шпалдар және басқа да бұйымдарды жеткізу бойынша келісімшарттар жасалды.
Қазіргі уақытта Мойынты - Балқаш учаскесінде жұмыстар жүргізілуде. Көкдамбақ – Сарықұм аралығына жер төсемі төселді. Сонымен қатар 80 км бекіткіштері бар шпалдар жеткізіліп, 62 км рельсті шпал торлары төсеуге дайындалды.
Құрылыс алаңында 125 бірлік арнайы техника және 200 жуық қызметкер жұмыс істейді. Жер төсемін салу және рельс-шпал торын төсеу үшін қосымша 6 төсеу пойызын және 8 хоппер-мөлшерлегішін тарту жоспарлануда.