Елімізде шетелдік компаниялардың қатысуымен локомотив пен вагон өндірісі іске қосылады
Корреспондент газеты «Қазақстан теміржолшысы»
Қазақстан үш шетелдік компанияның қатысуымен отандық зауыттарда локомотив пен вагон шығару өндірісін іске қосады, деп хабарлайды Rail-news.kz.
ҚР Индустрия және инфрақұрылымдық даму министрі Марат Қарабаевтың айтуынша, Үкіметпен еліміздің көлік-логистикалық әлеуетін дамытудың 2030 жылға дейінгі тұжырымдамасы бекіттілген.
Сондай-ақ транзиттік әлеуетті арттыру үшін вагон паркі тапшылығына қатысты мәселе шешіліп жатыр. «Stadler», «Alstom» және «Wabtec» компанияларының қатысуымен отандық зауыттарда вагон мен локомотив өндірісі басталады.
Министр сонымен қатар 800-ден астам жобадан тұратын жаңа индустриялық инвестициялық жобалар топтамасының іске асырылатынын айтты.
Бұдан бөлек, Мемлекет басшысына көлік инфрақұрылымының дамуы жөнінде ақпарат берілді. Тиісті тапсырма бойынша Үкімет еліміздің көлік-логистикалық әлеуетін дамытудың 2030 жылға дейінгі тұжырымдамасын бекітті.
Айта кетсек, бұған дейін Сенат депутаттары жолдаған сауалға Үкімет басшысы Әлихан Смайылов 2023 пен 2026 жылдар аралығында 187 тепловоз сатып алу жоспарланып отырғанын жеткізген (Wabtec және ресейлік технология бойынша Қазақстанда құрастырылған). Ал, 2023 пен 2029 жылдар аралығында электровоз парктері 245 Alstom локомотивімен жаңарады. Сондай-ақ 2029 жылға дейін Stadler технологиясымен жасалған 537 жолаушы вагонын жеткізу жоспарланып отыр. Ал, 2023-2024 жылдары ресейлік 307 жолаушы вагоны сатып алынады.