Он екі сағатта 1,6 шақырым жерге су жаңа рельс төселді (Фото)

Қызылорда темір жолының  Диірментөбе-Төретам станциялары аралығында жүріп жатқан күрделі жөндеу жұмыстарын «Интегра констракшн» серіктестігінің «Батыс» филиалы Қазалы учаскесінің теміржолшылары жүргізуде.

Телімнің 26,6 шақырымына Р-65 маркалы отандық рельс төсеп жаңартуды межелеп іске кіріскен олар күні кеше 12 сағаттық толаскез алып, жолдың 1650 метріне су жаңа рельс тізбектерін төседі. Таңертеңгі алакеуімнен толаскезге әзірлік жұмысына қамданған интегралықтардың әрқайсысы өздеріне тиесілі жұмыстарды пысықтап алып, арнайы техника мен ауыр жол машиналары мен тракторлар дайындығына көз жеткізіп жұмысқа жедел кірісті. Прорабтар Берік Арықбай мен Ерболат Абдуллаев, жол шеберлері Қуантай Ерлан мен Жасулан Ермекбаев пен бас механик Талғат Бейпілбаев жұмысқа жетекшілік жасауда.  

Ескі рельстерді УК-25/18 көтергіш кранының машинисі Дінмұханбет Мақұлов ретімен жинауға кіріскенде, ауыр тракторлар жол үстіне шығарылып, механиктер Ербол Оразмахан, Болат Жүсіп және Элдар Мардоновтың қадағалауымен технологиялық талапқа сай магистральдық төсемнің жол дистанциясының мамандары белгілеп берген қалыңдығына дейін аршып, артынша жол жиегіне ығыстыра итеріп тазалауға кіріскен Айбек Смағұловтың жұмысы өнімді жүріп жатыр. Жол жөндеушілер Әділ Сарпеков, Дәулет Тойбазар, Шүкірәлі Сейтов, Панабек Мырзағұлов, геодезист Серікбай Ақжол, жүргізуші Дінмуханбет Имамзадаев және оператор Ерболат Ишанқұлов та тез қимылдап, алдын ала белгіленген жұмыс ауқымын игеруде.  

Бұл телімде қос жолақты жол болғандықтан пойыздар кестеге сай өтіп жатты. Әрине пойыздар аталған учаскеге жақындағаннан барлық жұмыстар бұйрық бойынша тоқтатылып, құрамдар да жылдамдығын баяулатады. Жолдардың сапасын Қазалы жол дистанциясының бастығы Амантай Қосановпен бірге дистанцияның жауапты мамандары бақылап, қадағалап отырды. Сонымен қатар Қазалы электрмен жабдықтау және байланыс дистанциясының теміржолшылары да өздеріне тиесілі жұмыстарды атқарды.    

Жұмысшылардың ас-суы арнайы вагонда әзірленіп, перегонға автокөлікпен жеткізілді. Толаскез уақытын тиімді пайдалануға ұмтылған интегралықтар жұмысты тоқтатпай, топ-топ болып кезекпен түстік ішуде.  

– Бүгінгі ауа температурасы +40 градусқа жақын, аптап ыстық, ол аздай шаңды дауыл топырақты аспанға көтеріп, қолайсыздық туғызып тұр. Дегенмен жігіттер белгіленген жұмыс көлемін бітірмей тоқтамайды. Рельстер жайғастырылып, Хопер вагондарымен қиыршық тас төселгеннен кейін магнитті ЛБ және ВПО машиналары жұмысқа кіріседі. Олар жолды нығыздап тығыздаумен қатар жолдың түзулігін, рельс түйіспелерінің тепе-теңдігін реттейді. Ауыр машиналардың жол бабын жасау жұмыстарынан кейін телім сағатына 25 шақырым жылдамдықпен ашылып қолданысқа беріледі. Одан кейін технологиялық талапқа сай саралау жұмыстары жасалып, учаскелік жылдамдық белгіленеді, – деді «Батыс» филиалы Қазалы учаскесінің бастығы Әмірхан Жолдасбай.