Қаратау станциясында теміржолшылардың ғимараты жөндеуден өтті
"Қазақстан теміржолшысы" газетінің Жамбыл облысындағы меншікті тілшісі
Қаратау станциясындағы локомотив бригадаларының ауысу пунктінің техникалық ғимараты ағымдық жөндеуден өтіп жаңарып қалды. Іші ғана емес, сыртқы келбеті де өзгерген ғимарат алыстан көз тартады.
Локомотив бригадаларының өз жұмысын оңтайлы жүргізуі ауысу пункттеріндегі техникалық мүмкіндіктерді жақсартумен қатар, машинистердің еңбек етуіне жасалған қолайлы жағдайларға да тікелей байланысты.
Осы ретте ең алдымен пункттердің техникалық жайкүйі маңызды рөл атқарады. Қаратау станциясындағы ғимараттың сыртқы қабырғаларының қасбеттері, сондай-ақ іргетасының өзі екі рет қайтара боялған. ТЧЭ-31 Жамбыл локомотив пайдалану депосының бастығы Нұрболат Нұрсейітовтің айтуынша, ғимаратқа сумен жабдықтау құбыры тартылып, жаңадан жылыту радиаторы орнатылыпты.
«Ғимарат ішіне суық су ағатын қол жуғыштар қойылды. Ескі еден толықтай алынып тасталып, керамикалық төсеніштер төселді. Төбесі гипсокартон жабындарымен әрленіп, ішкі қабырғалары мен беткейлерінің сәндік үлгісі де үйлесім тауып тұр», – дейді ол.